काठमाडौं । नेपालको राजकीय भ्रमणमा रहनु भएका भारतीय प्रधानमन्त्री नरेन्द्र मोदीले शनिबार बिहान मुक्तिनाथ मन्दिरमा विशेष पूजाआजा गरेका छन ।
प्रधानमन्त्री मोदीलाई पुजारी कृष्णप्रसाद सुवेदी र झुमा कर्साङ गुरुङले मन्दिरभित्र करीब २० मिनेट पूजा गराएको थियो । भारतीय प्रधानमन्त्रीले षोडषोपचार विधिबाट पूजा गरेको श्रोतले जानकारी दिएको छ ।
मोदीलाई बाह्रगाउँ मुक्तिक्षेत्र गाउँपालिकाका अध्यक्ष र जिल्ला समन्वय समितिका सभापतिले कालीगण्डकी नदीको शालिग्राम उपहार दिएका थिए ।
करीब डेढ घण्टा मुक्तिनाथ क्षेत्रमा रहेका प्रधानमन्त्री मोदी विशेष हेलिकप्टरबाट काठमाडौँ फिर्ता भएको छ ।
काठमाडौं आएपछि मोदीले पशुपतिनाथ मन्दिरमा विशेष पूजा तथा काठमाडौं महानगरपालिकाको नागरिक अभिनन्दन ग्रहण गर्ने कार्यक्रम रहेको छ ।
प्रम मोदी अपरान्ह ४ बजे स्वदेश फर्किने कार्यक्रम रहेको छ ।