काठमाडौं । काठमाडौं महानगरपालिकाले काठमाडौंका भित्री सडकमा आजदेखि चारपांग्रे सवारी साधन प्रवेशमा रोक लगाएको छ । मंगलबारदेखि काठमाडौं महानगरपालिकाका १७, १८, १९, २२, २४, २५ र २७ वडामा पर्ने भित्री सडकमा चारपांग्रे सवारी प्रवेशमा रोक लगाइएको हो ।
सम्पदाको संरक्षण तथा साँघुरो बाटोमा सर्वसाधारणको चाप बढी हुने भन्दै यी क्षेत्रमा चारपांग्रे सवारी संचालनमा रोक लगाइएको हो ।
रातिको समयमा भने अहिले तत्कालका लागि चल्न पाउनेछन् । आजदेखि नरदेवीबाट भेडासिङ हुँदै इन्द्रचोकसम्म तथा टेङ्लबाट बाङ्गेमुढा , भेडासिङ, इन्द्रचोकसम्म र क्षेत्रपाटीबाट थहिटी लगायतका क्षेत्रमा सवारी साधन एकतर्फी मात्र जान पाउनेछन् ।
त्यसैगरी इन्द्रचोकबाट असन, इन्द्रचोकबाट भेडासिङ, ज्याठाबाट त्यौड, थहिटीबाट असन, कमलाक्षीबाट असन, महाबौद्धबाट असन, इन्द्रचोकबाट वटुसम्म चारपांग्रे सवारी साधनलाई पूर्णरुपमा निषेध गरिएको हो ।
बिहान ७ बजेदेखि बेलुका ७ बजे सम्म चारपांग्रे सवारीलाई रोक लगाइएको हो ।
