काठमाडौं । समय अभावका कारण अख्तियार दुरुपयोग अनुसन्धान आयोगले आन्तरिक राजस्व विभागका महानिर्देशक चुडामणि शर्मा सहित कर फस्र्योट आयोग विरुद्धको मुद्दा दायर गर्न सकेको छैन ।
अख्तियारले शर्मा सहित आयोगका अध्यक्ष लुम्बध्वज (एलडी) महत र अर्का सदस्य उमेश ढकाल विरुद्ध १० अर्ब ९६ करोड रुपैयाँ विगो सहित बिशेष अदालतमा मुद्दा दायरका लागि गएपनि समय अभाव भएकाले दार्ता हुन सकेन । आज (बिहीबार) मुद्दा दायर गर्न पालो नआएकाले त्यतिकै फर्कनु परेको अख्तियार स्रोतले जानकारी दिएको छ ।
आज दर्ता नभएकाले भोली अफिस खुल्ने वित्तिकै शर्मा र आयोग विरुद्ध मुद्दा दायर गरिने अख्तियारले जानकारी दिएको छ । अख्तियारले १ हजार ७९ मध्ये करिब ५० वटा मात्रै फाइल अध्ययन गरी विगो दाबी गरेको हो । हाल आयोगका अध्यक्ष महत र ढकाल भने फरार रहेका छन् ।
यसैगरी शुक्रबार नै सर्वोच्च अदालतमा शर्माको बारेमा वहश रहेको छ । बुधबार शर्माकी पत्नीले दायर गरेको बन्दी प्रत्यक्षीकरणको मुद्दामा सर्वोच्च अदालतले शुक्रवार शर्मालाई उपस्थित गराउन आदेश दिएको हो ।
आयोगले पटक–पटक म्याद थप गर्दै शर्मालाई डेढ महिनादेखि हिरासतमा राख्दै आएको छ ।
