बिजखबर संवाददाता
५ माघ, काठमाडौं । सरकारले अति कम विकसित र अविकसित क्षेत्रमा स्थापना भएका उद्योगहरुलाई ३ वर्षसम्म विद्युत् महसुलमा भारी छुट दिने भएको छ । त्यस्ता क्षेत्रमा स्थापना भएका उद्योगहरुलाई विद्युत महसुलमा ७० प्रतिशत छुट दिने निर्णय गरेको छ । सोमबार उद्योगमन्त्री महेश बस्नेतको अध्यक्षतामा बसेको औद्योगिक प्रवद्धर्न बोर्डको बैठकले सो निर्णय गरेको हो ।
उक्त निर्णय अनुसार रोल्पा सिमेन्ट उद्योगलाई लाग्ने विद्युत महसुलमा सञ्चालन भएको मितिले ३ बर्षका लागि ७० प्रतिशत छुट सुविधा उपलब्ध गराउन अर्थमन्त्रालयलाई सिफारिस गर्ने निर्णय गरेको छ ।
यसैगरी, ग्राण्डी इन्टरनेशनल हस्पिटलमा विदेशी लगानी ल्याउनका लागि समेत स्वीकृति प्रदान गरेको छ ।
बोर्डले तिला कर्णाली हाइड्रोइलेक्ट्रीकल कम्पनीको पुँजी बृद्धि गर्न स्वीकृति दिएको छ भने पुरानो प्रविधिका इट्टा उद्योगहरु आधुनिक प्रविधिमा रुपान्तरण गर्न २०७१ फाल्गुण मसान्तसम्म समय सिमा थपेको छ ।
बोर्डले जुटमिलको प्रति इकाइ उत्पादनमा हुने विद्युत खपतको मुल्याङ्कन गरि विद्युत महशुलमा छुट दिन अर्थ र उर्जा मन्त्रालय समक्ष सिफारिस गर्ने भएको छ ।
बार्डले नयाँ नगरपालिका भएका स्थानमा साविका बमोजिम नै उद्योगको अनुमति प्रदान गर्ने भएको छ । यसैगरी, उद्योग दर्ता गर्न, दर्ता भएका उद्योगहरुको पूँजी तथा क्षमता वृद्धि, उद्देश्य थप, विद्युत क्षमता थप, ठाउँसारी गर्न तथा विदेशी लगानी स्वीकृत मौजुदा व्यवस्था अनुसार नै गर्न सम्बन्धित निकायहरुलाई निर्देशन दिएको छ ।
