काठमाडौं । चीनतर्फ लैजान लागिएको २५ करोड रुपैयाँ बराबरको विदेशी मुद्राको वास्तविक मालिक पहिचान भएको छ । राजश्व अनुसन्धान विभागको जासुसी तथा विज्ञ टोलीले सीसीटिभी फुटेज, डिजिटल उपकरण, बैंक कारोबार, तथा कल डिटेल रेकर्ड (सीडीआर) विश्लेषण गर्दै मुद्राको स्रोत पत्ता लगाएको हो।
विभागका अनुसार सिन्धुपाल्चोक भोटेकोसी गाउँपालिका–४ स्थायी ठेगाना भएका र हाल काठमाडौं महादेवटार हाइट बस्दै आएका नारायण पौडेल उक्त रकमका वास्तविक मालिक हुन् ।
गत चैत्र ४ गते राति ११ बजे काठमाडौंको टोखा नगरपालिका–२, झोरमा ना ७ ख १६५२ नम्बरको मालवाहक ट्रकबाट प्रहरीले करिब २५ करोड रुपैयाँ बराबरको अमेरिकी डलर, युरो लगायतका विदेशी मुद्रा बरामद गरेको थियो।
काठमाडौं उपत्यका अपराध अनुसन्धान कार्यालयले पत्रकार सम्मेलनमार्फत उक्त घटनाबारे जानकारी गराएको थियो। सोही क्रममा ट्रक चालक कुसाङ लामा (४३), स्थायी ठेगाना सिन्धुपाल्चोक, भोटेकोसी गाउँपालिका–१ लाई पक्राउ गरिएको थियो।
मुद्राको वास्तविक मालिक पहिचान भएसँगै अदालतबाट पक्राउ पुर्जी लिई प्रहरीलाई आवश्यक कारबाही अघि बढाउन पत्राचार गरिसकिएको राजश्व अनुसन्धान विभागले जनाएको छ।
