काठमाडौं । गृह मन्त्रालयले राजावादीको हिंसात्मक प्रदर्शनका क्रममा ज्यान गुमाएकाहरूका परिवारलाई १० लाख रुपैयाँका दरले राहत प्रदान गर्ने निर्णय गरेको छ। शुक्रबार भएको उक्त प्रदर्शनमा प्रहरीको गोली लागेर प्रदर्शनकारी सविन महर्जनको मृत्यु भएको थियो।
त्यस्तै, समाचार संकलनका लागि खटिएका पत्रकार सुरेश रजकको सोही प्रदर्शनका क्रममा भएको आगलागीमा परेर ज्यान गएको थियो।
गृह मन्त्रालय स्रोतका अनुसार मृतक दुबै जनाका परिवारलाई १०(१० लाख रुपैयाँ उपलब्ध गराउन अर्थ मन्त्रालयलाई सिफारिस गरिसकिएको छ। साथै, सञ्चारमाध्यमका प्रतिनिधिहरूको सुरक्षाका लागि आवश्यक व्यवस्था गर्न प्रहरी प्रधान कार्यालयलाई निर्देशन दिइएको छ। सोही निर्देशनअनुसार प्रहरीले तयारी पनि सुरु गरिसकेको स्रोतले बताएको छ।
