काठमार्डौं । काठमाडौंमा गत शुक्रबार भएको राजावादीको आन्दोलनको क्रममा भाटभटेनीमा लुटपाट गर्नेहरु विरुद्द प्रतिकारमा उत्रेका सुरक्षागार्डहरु सम्मानित भएका छन् । भाटभटेनी सुपरमार्केटले आज एक कार्यक्रम गरेर सो दिन बहादुरी देखाउने सुरक्षागार्डहरुलाई सम्मान गरेको हो । राजावादी आन्दोलनको क्रममा प्रदर्शनकारीहरुले भाटभटेनीमा तोडफोड गर्दै सरसामानहरु लुटेका थिए । उनीहरु विरुद्द प्रतिकार गर्ने ५० बढी कर्मचारीलाई भाटभटेनीले सम्मान गरेको हो ।
गत चैत १५ गतेको घटनामा लुटपाट गर्न आएकालाई प्रतिकार गर्दै भाटभटेनीको सामान जोगाउने डुलप्रसाद पराजुलीलाई भाटभटेनीले विशेष सम्मानसहित पुरस्कृत गरेको हो । भाटभटेनीले उनलाई ५ लाख १ हजार १ सय ११ रुपैयाँ नगद पुरस्कार प्रदान गर्नुको साथै उनलाई पाँच ग्रेड बढुवा गरेको छ । भाटभटेनीका अध्यक्ष मीनबहादुर गुरुङले उनलाई दुबोको माला लगाइदिएर सम्मान गर्दै चेक प्रदान गरेका हुन् ।
लुटपाट र तोडफोडको क्रममा भाटभटेनीलाई जोगाउन भूमिका खेल्ने अन्य सुरक्षा गार्डहरु पनि सम्मानित भएका छन् । यसरी सम्मान हुनेमा सुरक्षा गार्डहरु सूर्य गिरी, दीपेश खड्का, र सोमबहादुर भुजेल रहेका छन् । उनीहरुले २५ हजार १ सय ११ रुपैयाँ नगद पाएका छन् भने एक ग्रेड बढुवा भएका छन् । ग्रोसरी सिनियर सुपरभाइजर सागर गुरुङले ५१ हजार एक सय ११ रुपैयाँको चेक र दुई ग्रेड बढुवा प्राप्त गरेका छन् ।
