काठमाडौं । सिजी इलेक्ट्रोनिक्सले सतुंगलस्थित गोदाममा भएको आगलागीपछि बीमा दाबी गर्दा अनियमितता गरेको सर्वोच्च अदालतको फैसलाले पुष्टि गरेको छ। बीमा प्राधिकरणले पहिल्यै उठाएको शंका सर्वोच्च अदालतले सदर गर्दै चौधरी ग्रुपको बीमा दावी गलत रहेको ठहर गरेको हो ।
२०६९ साल असोज २८ गते साँझ आगलागी भएपछि सिजी इलेक्ट्रोनिक्सले युनाइटेड अजोड इन्स्योरेन्ससँग ५८ करोड रुपैयाँको क्षतिको दाबी गरेको थियो। अनुसन्धानपछि बीमा समितिले वास्तविक क्षति करिब ३५ करोड मात्र रहेको निष्कर्ष निकालेको थियो। तर, कम्पनीले सेटिङ्ग गरेर गलत विवरण पेश गरेको पाइएपछि बीमा समितिले ३९ करोड भुक्तानी रोक्न निर्देशन दिएको थियो।
करिब सात वर्षसम्म अदालतमा चलेको मुद्दामा सर्वोच्च अदालतले आज अन्तिम फैसला गर्दै चौधरी ग्रुपको दाबी गलत रहेको ठहर गरेको छ। अब सिजी इलेक्ट्रोनिक्सले करिब चार करोड रुपैयाँ बीमा कम्पनीलाई फिर्ता गर्नुपर्नेछ।
यस फैसलाले बीमा क्षेत्रमा नियमनलाई थप सशक्त बनाउने संकेत गरेको छ। व्यावसायिक घरानाले बीमा दाबीमा ुफ्रडु गर्न खोजेमा त्यसलाई कानुनी रूपमा चुनौती दिइने स्पष्ट सन्देश सर्वोच्च अदालतले दिएको छ।
