काठमाडौं । प्रतिनिधि सभाको यस महिनाभरी बस्ने बैठकको संसदीय क्यालेन्डर तय भएको छ । आज बसेको प्रमुख दलका प्रमुख सचेतक र सभामुख देवराज घिमिरेबीचको छलफलमा यस महिनाभरी बस्ने संसदीय समिति र सदनको बैठकको दिन टुंगो लगाईएको हो ।
माघ १८ गतेबाट सुरु हुने बैठक ३० माघसम्म ७ दिन बस्ने भएको छ । पहिलो बैठक १८ गते बसेपछि २२ गते अर्को बैठक बस्नेछ । सो बैठकमा हालै सरकारले ल्याएका ५ वटा अध्यादेश निर्णयार्थ प्रस्तुत हुनेछ ।
माघ २३ र २४ गते पनि सदन बस्ने तय भएको छ । यसैगरी, माघ २५, २६ र २७ गते समितिको बैठक राखिने छ । माघ २८, २९ र ३० गते पनि सदन बस्ने तय भएको छ ।
यसैबीच संसद्को पहिलो दिन सबै शीर्ष नेताले सम्बोधन गर्ने भएका छन् । आज बसेको सभामुख देवराज घिमिरे र दलका सचेतकबीचको छलफलमा प्रधानमन्त्री केपी शर्मा ओलीसहित सबै शीर्ष नेताले सम्बोधन गर्ने सहमति भएको हो ।
