बिजखबर संवाददाता
२२ पुस, काठमाडौं । व्यवस्थापिका–संसद्को विकास समितिले चीनको रेल सञ्जालसँग नेपाललाई जोड्न रसुवा–केरुङ रेल्वे मार्गको सम्भावना बारे अध्ययन गर्न निर्देशन दिएको छ । समितिको आज वसेको बैठकले यस्तो निर्णय दिएको हो ।
समितिको आजको बैठकमा नेपालमा रेल्वे यातायातको विकासको संभावना, देशको समग्र आर्थिक विकास एवम् भौतिक पूर्वाधारको विकासमा रेल्वे यातायातको महत्वका सम्बन्धमा छलफल भएको थियो ।
समितिले रेल्वे लाइनको विकास र विस्तारका साथै विद्यमान रेल्वे यातायातको स्तरोन्नति र विस्तार गर्न यथेष्ट बजेट छुट्याई कार्यान्वयनमा लैजान भौतिक पूर्वाधार तथा यातायात व्यवस्था मन्त्रालय, अर्थ मन्त्रालय र रेल विभागलाई निर्देशन दिएको छ ।
बैठकमा समितिका सभापति रवीन्द्र अधिकारीले मुलुकको आर्थिक विकासका लागि रेल्वे यातायातको विकास एवम् विस्तारका लागि अत्यावश्यक पर्ने रणनीतिका साथै अन्य नीतिगत र कानुनी व्यवस्था गर्न सम्बन्धित निकायलाई निर्देशन दिएको छ ।
साथै, समितिले अन्तरदेशीय एसियाली रेल सञ्जाल विस्तारसम्बन्धी अभिसन्धिको आयोजनाको विस्तृत परियोजना अध्ययन प्रतिवेदन तयार गरी कार्यान्वयनको प्रक्रियामा लैजाने निर्णय समेत गरेको छ ।
