काठमाडौं । चालु आर्थिक बर्षको पहिलो दुई महिनामा मात्रै नेपालमा १६ सय बढी विद्युतीय चारपांग्रे सवारीसाधन आयात भएका छन् । भन्सार विभागले सार्वजनिक गरेको तथ्यांकअनुसार चालु आवको साउन र भदौमा मात्रै ५० किलोवाटदेखि ३ सय किलोवाट माथि क्षमता भएका १ हजार ६ सय २ वटा विद्युतीय चारपांग्रे सवारीसाधन आयात भएका हुन् ।
यस अवधिमा आयातित विद्युतीय सवारीसाधन खरिदमा नेपालबाट ३ अर्ब ८२ करोड ७४ लाख रुपैयाँ बाहिरिएको छ । भन्सार विभागको तथ्यांकलाई आधार मान्दा यस अवधिमा सबैभन्दा बढी ५१ किलोवाटदेखि १ सय किलोवाटसम्म क्षमता भएका विद्युतीय कारहरु आयात भएको देखिन्छ । साउन र भदौको महिनामा यो क्षमताको वर्गमा पर्ने २ अर्ब ४३ करोड २१ लाख रुपैयाँ मूल्य का ९ सय ३८ विद्युतीय कार नेपाल भित्रिएका हुन् ।
यस्तै यसै अवधिमा नेपालमा ५० किलोवाटसम्म क्षमता भएका १ अर्ब ४ करोड ६१ लाख रुपैयाँ बराबरका ५ सय ६० थान विद्युतीय कारहरु भित्रिएका छन् । साथै यस अवधिमा २०१ देखि ३ सय किलोवाटसम्म क्षमता भएका १ करोड ८४ लाख रुपैयाँ बराबरका ३ थान, १०१ देखि २ सय किलोवाट क्षमताको ३२ करोड २३ लाख रुपैयाँ बराबरका ९९ थान र ३ सय किलोवाट माथि क्षमता भएको २ थान विद्युतीय कार नेपाल भित्रिएको देखिन्छ । साउन र भदौमा नेपाल भित्रिएका विद्युतीय सवारीसाधनमार्फत नेपालले २ अर्ब ३१ करोड २२ लाख रुपैयाँ राजस्व संकलन गरेको छ ।
भदौमै भित्रिए धेरै कार
चालु आर्थिक बर्षको भदौमा मात्रै १२ सय बढी विद्युतीय कारहरु नेपाल भित्रिएको भन्सार विभागले जानकारी दिएको छ । विभागका अनुसार चालु आवको भदौमा ५० किलोवाटदेखि ३ सय किलोवाट माथि क्षमता भएका १ हजार २ सय २१ विद्युतीय सवारीसाधनहरु भित्रिएका हुन् ।
जसमध्ये भदौमा ५० किलोवाट क्षमताका ३ सय ९९, ५१ किलोवाट देखि १०० किलोवाट क्षमताका ७ सय २२ र १ सय १ देखि २ सय किलोवाटसम्म क्षमताका ९८ विद्युतीय कार नेपाल भित्रिएका हुन् । भदौमै २०१ देखि ३ सय र ३ सय किलोवाट माथि क्षमता भएका १–१ विद्युतीय कारहरु नेपाल भित्रिएको विभागले जानकारी दिएको छ ।
यसअघि साउनमा ५१ किलोवाटदेखि १ सय किलोवाटसम्म क्षमता भएका २ सय १६ थान विद्युतीय कार नेपाल भित्रिएका थिए । यस्तै साउनमै नेपालमा १ सय ६१ थान विद्युतीय कारहरु ५० किलोवाटसम्म क्षमता भएका, २०१ देखि ३ सय किलोवाटसम्म क्षमता भएका २ थान, १०१ देखि २ सय किलोवाट क्षमताको १ थान र ३ सय किलोवाट माथि क्षमता भएको १ थान विद्युतीय कार नेपाल भित्रिएका थिए ।
