काठमाडौँ । राष्ट्रिय स्वतन्त्र पार्टी (रास्वपा) का सभापति तथा पूर्व गृहमन्त्री रवि लामिछानेले गोर्खा मिडियामा गलत ढंगले सहकारीको रकम आएको स्वीकारेका छन् । आज (सोमबार) धनगढीमा पत्रकारहरूसँग उनले सहकारीको रकम गोर्खा मिडियामा आएको अनुसन्धानबाटै पुष्टि भइसकेको स्वीकारेका हुन् । यसअघि आफूलाई यो विषयमा केही थाहा नभएको जिकिर गर्दै आएका बताए ।
‘गोर्खा मिडिया लगायतका ठाउँमा गलत ढंगबाट सहकारीको रकम आएको कुरा ठीक हो,’ उनले भने, ‘त्यो स्थापित भइसकेको कुरा हो । अनुसन्धानले पनि देखाइसकेको कुरा हो । तर, त्यो कसले गर्यो भन्ने कुरा पनि अदालतमा प्रवेश गरिसकेको छ । क–कसले बदमासी गर्यो भन्ने पनि स्पष्ट भइसकेको छ ।’
गलत ढंगले सहकारीको रकम गोर्खा मिडियामा ल्याउन आफू संलग्न नभएको उनले दाबी गरे । ‘मेरो संलग्नता भएको रहेछ भने त मैले तिर्नुपर्छ,’ उनले भने, ‘मैले कहाँ तिर्न जाने भन्नु पर्यो । म भएको समयमा बदमासी भयो र तेरो पनि जिम्मेवारी हो भन्ने एउटा तर्क होला । तर, अन्यले गरेको बदमासीको भारी मैले लिनुपर्ने होइन । त्यो म भएकै बेलामा बदमासी भए पनि त्यो बदमासी कसले र कसरी गर्यो भन्ने कुरा स्पष्ट छ ।’
उनले संसदीय छानविन समितिले सत्यतथ्य बाहिर ल्याउनेमा आफू आशावादी पनि रहेको बताएका छन् । ‘धेरै व्यक्ति लाखौं सहकारी पीडितको न्यायका लागि भन्दा पनि रवि लामिछानेलाई दोषी देखाउन केन्द्रित भएका छन्,’ उनले भने, ‘त्यसको मूल्यांकन इतिहासले गर्नेछ । तर, पीडितले न्याय पाउनेमा म आशावादी छु ।’
अहिलेको सरकारको सुरुवाती छनक राम्रो नदेखिएको पनि लामिछानेले आरोप लगाएका छन् । ‘उहाँहरू (एमाले–कांग्रेस) ले हामी नै निर्विकल्प हौं भन्ने जुन सोच्नु भएको थियो, तर सुरुवाती छनक राम्रो देखिएको छैन,’ उनले थपे, ‘तर, केही समय कुर्न अझै सकिन्छ र समय दिन कुर्नुपर्छ ।’ उनले पहिलेको सरकारले भ्रष्टाचार नियन्त्रणका लागि खोलेका फाइलबारे अहिले के भइरहेको छ भन्ने विषयमा आफूलाई जानकारी नभएको तर खबरदारी गरिरहेको बताए ।
