काठमाडों । नेपाल प्रहरीको केन्द्रिय अनुसन्धान ब्युरो (सीआइबी)ले एभरट्रष्ट बचत तथा ऋण सहकारी संस्थाका उपाध्यक्षसहित ५ जनालाई पक्राउ गरेको छ । सीआइबीले उनिहरुलाई सहकारीमार्फत बचतकर्ताको १५ करोड ९१ लाख रुपैयाँ ठगेको आरोपमा अनुसन्धानका लागि पक्राउ गरेको हो ।
काठमाडौं महानगरपालिका–७ चुच्चेपाटी रहेको सहकारीका उपाध्यक्ष बबिता डंगोलसहित ५ जना पक्राउ परेका हुन् । उपाध्यक्ष बबिता डंगोलका साथै संस्थाका सचिव काठमाडौं महानगरपालिका–५ हाँडीगाँउका कान्छाभाई डंगोल , कोषाध्यक्ष ओखलढुंगा कुन्तादेवी गाँउपालिका–३ का विष्णु प्रसाद फुयाँल, संस्थाका सदस्य ललितपुर महानगरपालिका–८ सुवलाहका रामलाल महर्जन र सहकारीका सदस्य भक्तपुर नगरपालिका–१ का अमरभाई बज्राचार्य रहेको सीआइबीले जानकारी दिएको छ ।
उनीहरुले कर्जा तथा सम्पत्तिहरुमा गैह्रकानुनी रुपमा लगानी गरी संस्थाको वार्षिक प्रतिवेदनहरुमा समेत बास्तविक अवस्था लुकाएको पाइएको छ ।
बचतकर्ताको पैसा व्यक्तिगत लाभको लागि प्रयोग गरी सहकारी संस्थालाई हानी नोक्सानी पुर्याइ, आर्कषक ब्याजदर दिन्छु भनि प्रलोभन देखाएर ठगेको आरोप उनीहरुमाथि छ ।
५ जनालाई नै काठमाडौंका विभिन्न स्थानबाट भदौ १४ गते पक्राउ गरी मुलुकी अपराध संहिता २०७४ को दफा २४९ को ठगी सम्बन्धी कसुरमा काठमाडौं जिल्ला अदालतबाट ८ दिन म्याद थपेर अनुसन्धान भइरहेको सीआईबीले जनाएको छ ।
यो सहकारीबाट कोही पीडित भएमा यथाशिघ्र ब्यूरोमा सम्पर्क गर्न भनिएको छ ।
