काठमाडौं । आन्तरिक पर्यटनको प्रवद्र्धन गर्दै काठमाडौंबाट ऐतिहासिक स्थल सिन्धुलीगढीसम्म साइकल यात्रा गरिएको छ । समृद्ध सिन्धुली नागरिक अभियानले गरेको सो कार्यक्रममा ८० जना व्यवसायीक साइकल यात्री सिन्धुली गढीको टुप्पोमा पुगेका हुन् ।
‘राइड टु सिन्धुली गढी’ नाम दिइएको साइकल यात्रा काठमाडौं–धुलिखेल हुँदै जाने रमणीय वीपी राजमार्गमा भएको थियो । साइकल ¥याली सिन्धुली गढीमा मनाइएको विजयोत्सवमा सहभागी भएको थियो ।
सिन्धुलीगढी वीर गोर्खालीले तत्कालीन ब्रिटीस कम्पनीको सेनालाई पराजित गरेको ऐतिहासिक स्थल हो । त्यहाँ हरेकबर्षको कात्तिक २४ गते तत्कालीन गोर्खाली सेनाले विजय हासिल गरेको सम्झनामा विजयोत्सव मनाउने गरिएको छ ।
साइकल यात्राको नेतृत्व प्रसिद्ध विश्व साइकल यात्री पुस्कर शाह र अर्का यात्री देवेन्द्र बस्न्यातले गरेका थिए । यात्रीले सिन्धुलीगढीको ठूलो गढमा साइकल पु¥याएर बीर गोर्खालीको स्मरण गरेका थिए । यात्रीले साइकल काँधमा बोकेर ठूलो गढको सिडी पार गरेका थिए । ठूलो गढ महाभारत पर्वत श्रृङ्खलाको टुप्पोमा पर्छ ।
साइकल यात्राको माध्यमबाट सिन्धुलीगढीलाई विश्वसामु परिचित गराउने समृद्ध सिन्धुली अभियानले लक्ष्य लिएको छ । यस्तो साइकलयात्रा हरेक बर्ष गर्ने अभियानको योजना छ । यस वर्षको साइकल यात्रा आयोजना गर्न पर्यटन बोर्डले सघाएको थियो । यात्रीका लागि आयोजकका तर्फबाट खाने, बस्ने, टिसर्ट, बीमा, फर्कँदा सवारी साधनलगायतको ब्यवस्था मिलाइएको थियो । काठमाडौंबाट झण्डै १ सय ३५ किलोमिटर यात्रा साइकल यात्रीले तय गरेका थिए ।
