काठमाडौं । बझाङमा पहिरोमा पुरिएर एकै परिवारका चार जना बेपत्ता भएका छन् । आइतबार राति बुङ्गल नगरपालिका–१० को टुमेडामा पहिरोमा पुरिएर चार जना बेपत्ता भएको प्रहरीले जनाएको छ ।

पहिरोले स्थानीय वीरा धामीको घर पुरिंदा चार जना बेपत्ता भएको सुदूरपश्चिम प्रदेश प्रहरी कार्यालयका प्रमुख प्रहरी नायब महानिरीक्षक रवीन्द्र केसीले जानकारी दिए । पहिरो खस्दा बिरा धामीका श्रीमती, बुहारी र दुई नातिनी बेपत्ता भएका छन् ।

९ जना सदस्य रहेको उक्त घरमाथि राति १ बजे खसेको पहिरोले घरमा क्षति पुगेको छ । पहिरो जाने बित्तिकै गाउँलेको प्रयासले पाँच जनाको जीवितै उद्धार गरिएको छ भने चार जना बेपत्ता भएको त्यहाँ स्थानीय भरत महरले जानकारी दिएका छन् ।

बिरा धामी , उज्जल धामी, रोसन धामी, कमला धामी, शान्ति धामीको उद्धार भएको र उनीहरू सकुशल रहेका स्थानीयले जनाएका छन् । काली धामी, गोल्की धामी, आसिका धामी, लक्ष्मी धामी भने भेटिएका छैनन ्। उनीहरुको खोजी भइरहेको स्थानीयले बताए । घटनाबारे विस्तृत विवरण आइसकेको छैन ।