काठमाडौं । राष्ट्रिय स्वतन्त्र पार्टी (रास्वपा) ले आफ्नो पूर्व महामन्त्री मुकुल ढकाललाई २४ घण्टे स्पष्टीकरण सोधेको छ । रास्वपाबाट ढकाललाई प्राप्त पत्रअनुसार पार्टीको साधारण सदस्यबाट किन ढकाललाई निष्कासन नगर्ने भन्दै २४ घण्टे स्पष्टीकरण सोधिएको छ ।
यसअघि नै ढकाललाई पार्टीको महामन्त्री, केन्द्रीय सदस्य र प्रवक्ताको पदबाट हटाएको रास्वपाले बुधबार पत्राचार गर्दै स्पष्टीकरण सोधेको हो ।
कार्यवाहक महामन्त्री कविन्द्र बुर्लाकोटीले सोधेको स्पष्टीकरणमा भनिएको छ, ‘पार्टीविरुद्ध नियोजित रुपमा निरन्तर सक्रिय तपाईंलाई पार्टीको साधारण सदस्यबाट किन निष्कासन नगर्ने ? तपाईंको साधारण सदस्यता किन खारेज नगर्नु पर्ने? आफ्ना आधार प्रमाण तथा भनाइसहित २४ घण्टाभित्र पार्टीमा स्पष्टीकरण पेस गर्नु हुन सूचित गरिन्छ ।’
