काठमाडौं । लायन्स क्लव अफ काठमाडौं कर्पाेरेट नेपालले लायन्स कर्पाेरेट सोसल अवार्डको चौथो श्रृङखला आयोजना गर्ने भएको छ ।
लायन्स क्लवले समाजका विभिन्न क्षेत्रमा योगदान गरेका व्यक्तित्वहरुलाई सम्मान गर्ने उद्देश्यले साउन १९ गते शनिबार उक्त अवार्ड कार्यक्रम आयोजना गर्न लागेको हो । लायन्सले निरन्तर रुपमा तीन वर्षदेखि लायन्स कर्पोरेट सोसियल अवार्ड आयोजना गर्दै आएको छ । विभिन्न वर्ग, पेशा र क्षेत्रमा रहेर समाजका लागि सकारात्मक योगदान गर्ने व्यक्तित्वहरुलाई लायन्स क्लवले यो अवार्डमा सम्मानित गर्ने गर्छ ।
देशमा केही भएन भन्ने सोचका कारण व्याप्त निराशाले पूरा समाजलाई गाँजिरहेका बेला यहीं भित्र भएका सकारात्मक कामलाई प्रोत्साहन गर्ने लायन्स क्लवको उद्देश्य हो । यही उद्देश्यबाट प्रेरित हुँदै आयोजना गरिएको अवार्डले समाजमा सकारात्मक योगदान गर्नेहरुमा हौसला मिल्नुका साथै अरु थुप्रै नागरिकलाई पनि सकारात्मक काममा लाग्ने प्रेरणा प्रदान गर्ने हामीले विश्वास लिएका छौं ।
