काठमाडौं । यस वर्षको उत्कृष्ट निजामती सेवा पुरस्कार अर्थ सचिव शान्तराज सुवेदीलाई प्रदान गरिएको छ । बुधवार १३ औं निजामती सेवा दिवसको अवसरमा राजधानीमा आयोजित कार्यक्रममा प्रधानमन्त्री पुष्पकमल दाहालले सुवेदीलाई उत्कृष्ट निजामती सेवा पुरस्कार प्रदान गरे ।
मुख्य सचिव डा.सोमलाल सुवेदीको सयोजत्वका गठित पाँच सदस्यीय पुरस्कार छनौट समितिले सचिव सुवेदीलाई सर्वोत्कृष्ट पुरस्कार दिइने निर्णय गरेको थियो । पुरस्कारको राशि रु.२ लाख रहेको छ ।
सो अवसरमा यसवर्षको उत्कृष्ट निजामती सेवा पुरस्कार १० जनालाई प्रदान गरिएको छ । पुरस्कार पाउनेमा किरण पौडेल सहन्यायधिवक्ता महान्याधिवक्ताको कार्यालय, देवेन्द्र कार्की भौतिक पूर्वाधार तथा यातायात मन्त्रालयका सहसचिव, खगेन्द्रप्रसाद सुवेदी मुख्य मनोविज्ञान वेत्ता सहसचिव लोक सेवा आयोग गजेन्द्रबहादुर श्रेष्ठ उपमहालेखा नियन्त्रक महालेखा नियन्त्रकको कार्यालय, प्रदीपराज कँडेल उपसचिव गृहमन्त्रालय रहेका छन् ।
यसैगरी कानुन न्याय तथा संसदीय मामिला मन्त्रालयका उपसचिव हुमबहादुर केसी , माधवप्रसाद लामिछाने निर्देशक महालेखा परीक्षकको कार्यालय, हरिबाबु पोखरेल उपसचिव अख्तियार दुरुपयोग अनुसन्धान आयोग, गोकुल बस्नेत उपसचिव प्रधानमन्त्री तथा मन्त्रिपरिषद्को कार्यालय र कृष्णवहादुर बोगटी इन्जिनियर खानेपानी तथा सरसफाइ कार्यालय बझाङ रहेका छन् । पुरस्कारको राशि जनही एक लाख रहेको छ । उनीहरुको नाम समितिले सिफारिस गरेको हो ।
