काठमाडौं । पुँजी बजार विकास र विस्तारका लागि तत्काल कार्ययोजना पेश गर्न अर्थमन्त्री बर्षमान पुनले निर्देशन दिएका छन् । लामो समयदेखि जकडिएर बसेको सेयर बजारको समस्या पहिचान गरी १ हप्ताभित्र कार्ययोजना पेश गर्न निर्देशन दिएका हुन् । अर्थमन्त्री पुनले सेयर बजारसँग सम्बन्धित नियामक निकाय नेपाल धितोपत्र बोर्ड, नेपाल स्टक एक्स्चेञ्ज र सिडीएससीलाई सम्बद्ध सरोकारवालाहरुसँग राय लिएर कार्ययोजना पेश गर्न निर्देशन दिएका हुन् ।
२०७८ भदौंमा हालसम्मकै उच्च ३ हजार २ सय अंक पार गरेर झरेको बजार त्यसयता लगातार वियरिस ट्रेण्डमा छ । समान्यतया बजारमा लगानीयोग्य रकमको अभाव र कर्जाको ब्याजदर उच्च हुँदा नेप्से परिसुचक घट्छ । तर, पछिल्लो समय बजारमा उच्च तरलता र सोही अनुरुप कर्जाको ब्याज निरन्तर घट्दा पनि सेयर बजार भने बढ्न सेकेको छैन । सोही अनुरुप देशको अर्थतन्त्र विकासमा महत्वपूर्ण भुमिका खेल्ने पुँजी बजारमा देखिएका समस्या समाधान एवं त्यस क्षेत्रको विकास र विस्तारका लागि तत्काल गर्नुपर्ने कामको सम्बन्धमा सम्बन्धित सरोकारवालाहरुको राय लिई एक हप्ताभित्र कार्ययोजना पेश गर्न अर्थमन्त्री पुनले निर्देशन दिएका हुन् ।
अहिले ६२ लाख डिक्याट खात र ३४ लाख सक्रिय लगानीकर्ता छन् । सोही अनुरुप सरकार सफल र असफलको ऐनाको रुपमा सेयर बजारको वृद्धि र गिरावटलाई हेरिँदै आएको छ । सेयर बजार बढ्दा सरकार सफल भएको भन्दै समाचारदेखि सामाजिक संजालहरुमा प्रचारप्रसार गरिन्छ भने घट्दा सरकारको अफलतासँग जोडिन्छ । पछिल्लो समय समय लगानीकर्ताको मनोविज्ञानले पूर्व अर्थमन्त्री विष्णु पौडेललाई पुँजी बजारमैत्री मन्त्रीको रुपमा लिँदै आएको छ । यसपटक पनि अर्थमन्त्री पौडेल बन्ने हल्लाले बजारमा लामो समयपछि एकाएक सर्किट लागेको थियो । तर, अर्थमन्त्रीको रुपमा उनको चर्चा हराएसँगै भोलिपल्टै बजारमा उच्च गिरावट आएको थियो ।
उद्यपि नयाँ अर्थमन्त्रीको रुपमा बर्षमान पुनको इन्ट्रीसँगै सेयर बजारले सर्पोट गर्दै लगातार उकालो बाटो तय गरेको छ । अर्थमन्त्री पुनले आफुले कार्यभार सम्हालेसँगै जकडिएको सेयर बजार सुधारका लागि सम्बद्ध सरोकारवालासँग छलफल अघि बढाएका छन् भने हिजो (आईतबार) मात्रै सम्बद्ध निकायलाई कार्ययोजना पेश गर्न निर्देशन दिएका छन् । अर्थमन्त्रीको उक्त सक्रियातासँगै पुँजी बजारले गति लिने सम्बद्ध लगानीकर्ताहरु बताउँछन् ।
