काठमाडौं । विभिन्न काण्ड र चलखेलका कारण सधैजसो विवादमा रहने गरेका नेपाल पर्यटन बोर्डका निवर्तमान कार्यकारी प्रमुख डा. धनन्जय रेग्मी फेरि विवादमा परेका छन् । रेग्मीले गत शुक्रबार एक राष्ट्रिय टेलिभिजनमार्फत प्रसारित अन्तर्वार्ता कार्यक्रममा बोर्डका कर्मचारीहरु, कार्यकारी समितिका पदाधिकारीहरु, पर्यटन मन्त्रालयका सचिव र पर्यटन मन्त्रीहरुप्रति लक्षित गर्दै भ्रामक र कपोलकल्पित ढंगबाट सबैका मानमर्दन हुने गरी अभिब्यक्ति दिएसँगै उनी विवादमा परेका हुन् ।
सोसम्बन्धमा नेपाल पर्यटन बोर्ड कर्मचारी संगठनले एक विज्ञप्ति नै जारी गरेर डा. रेग्मीको अभिव्यक्तिप्रति गम्भीर ध्यानाकर्षण भएको जनाएको छ । संगठनले डा. रेग्मीले बोर्डको विधि र नियम सम्मत कामहरुको बारेमा अनर्गल प्रचार गर्ने र यस संस्थाका कर्मचारीहरु र पदाधिकारीहरुलाई निराधार आक्षेप लगाउने जस्ता कार्यहरू गरेको विषय सामान्य नैतिक मूल्य वाहिर पर्ने मात्र नभै नेपालको प्रचलित कानुनद्वारा समेत वर्जित रहेको उल्लेख गरेको छ छ । ‘यस्ता विवादित व्यक्तीले निजको व्यक्तिगत स्वार्थ पुरा गर्न नमानेपछि बोर्ड र बोर्डका कर्तव्यनिष्ठ कर्मचारीहरु र पदाधिकारीहरु विरुद्ध विष वमन गर्दै दिएका अभिव्यक्ती र व्यवहारको यो संगठन घोर भर्त्सना गर्दछ’, संगठनको विज्ञप्तिमा छ ।
विज्ञप्तिमा रेग्मीको कार्यकाल नेपाल पर्यटन बोर्डका लागि एक अंध्यारो काल खण्डको रूपमा रहेको बताइएको छ ।‘आगामी दिनहरुमा सरकारी र निजि सहकार्यको नमुना संस्था र यसका इमान्दार र कर्मठ कर्मचारीविरुद्ध र यस बोर्ड सँग प्रत्यक्ष र अप्रतक्ष्य सम्वन्ध हुने कार्यकारी समितिका पदाधिकारी, पर्यटन मन्त्रालयका सचिव र पर्यटन मन्त्रीहप्रति यसरी निर्लज्ज रुपमा वाहियात र बेढंगी कुप्रचार नगर्न यस संगठन चेतावनी दिन चाहन्छ,’विज्ञप्तिमा छ ।
