काठमाडौं । नेपाली बजारमा पछिल्लो हप्तायता सुनको मूल्य निरन्तर ओरालो लागिरहेको छ । गत हप्ताको बिहीबारसम्म प्रतितोला १ लाख १२ हजार ५ सय रुपैयाँमा कारोबार भईरहेको सुनको मूल्य आजसम्म घटेर १ लाख ९ हजार ६ सय रुपैयाँमा सीमित भएको छ ।
यसरी नेपाली बजारमा एक हप्तामै करिव ३ हजार रुपैयाँले घटेको सुनको मूल्य प्रवृत्ति अन्तरराष्ट्रिय बजारमा पनि ओरालो बाटोमा छ । सुनको मूल्यको आधिकारिक तथ्यांक प्रकाशक गोल्ड प्राइसका अनुसार अन्तरराष्ट्रिय बजारमा भने सुनको मूल्य एक हप्तामै ५१.८४ डलर प्रतिऔंसले घटेको छ । गत हप्ताको बिहीबार प्रतिऔंस १ हजार ९ सय २९.४८ डलरमा कारोबार भईरहेको सुनको मूल्य आज घटेर १ हजार ८ सय ७७ डलरको आसपासमा पुगेको छ ।
खासगरी पहेँलो धातुलाई धेरैजसोले आफ्नो सम्पत्तिको रुपमा बैंकमै राखेका हुन्छन् । यसरी राखेको सुनको मूल्यांकन बढ्दै गएको खण्डमा मूल्य पनि बढ्ने र मूल्यांकन घट्दै गएको अवस्थामा मूल्य पनि घट्ने गर्दछ । तर, पछिल्लो समय अमेरिकी फेडरल रिजर्भ बैंक (फेड)ले विश्वबजारमा डलरको वर्चस्व कायम राखिराख्न आफ्नो ब्याजदर बढाएपछि यसको असर सुनको मूल्यमा परेको नेपाल सुनचाँदी व्यवसायी महासंघका अध्यक्ष मणिकरत्न शाक्यले जानकारी दिए ।
उनका अनुसार पछिल्लो समय मात्रै फेडले ब्याजदर ०.२५ प्रतिशतले बढाएको छ । खासगरी हाल विश्वबजारमै अमेरिकी डलरको दवदवाको अन्त्य गर्नका लागि ठूला देशहरु लागिपरेकाले यसबाट उम्किन फेडले बैंक ब्याजदर बढाएको हो । यसरी बैंक ब्याजदर बढ्दा सुनको भन्दा डलरको रिटर्न बढी हुनेभएपछि सुनको मागमा नै संकुचन आयो र मूल्यांकन खुम्चियो । यसको असर सुनको मूल्यमा पनि पर्यो ।
खासगरी फेडले सन २०२२ को मार्चयता मात्रै ११ पटक आफ्नो ब्याजदरमा घटबढ गरेको छ । यसरी ब्याजदर घटबढ हुँदा एक बर्षको अवधिमा ब्याजदर ०.२५ प्रतिशतले बढेर हाल ५.५० प्रतिशत पुगेको छ । यसअघि फेडको ब्याजदर ५.२५ प्रतिशत थियो । केहि क्षणिक समयको लागि सुनको मूल्य ओरालो लागेकोजस्तो देखिएपनि कालान्तरमा रुस युक्रेन युद्ध र विश्वव्यापारमा देखिएको नयाँ आयामले सुनको मूल्य अझै उकालो लाग्ने शाक्य बताउँछन् ।
