काडमाडौं । आइतबार रिलायबल नेपाल लाईफ इन्स्योरेन्स कम्पनीको सेयर कारोबार उच्च देखिएको छ । सर्वसाधारण लगानीकर्ताले आईपीओेमा १० कित्ता सेयर पाएपनि कारोबार खुलेकै दिन उच्च कारोबार भएको छ ।
घट्दो बजारमा आईपीओमा म्युचुअल फण्डले पाएको कोटाको सेयर बिक्री गरेर बाहिरिन थालेपछि सो कम्पनीको सेयर कारोबार उच्च भएको हो ।
कारोबारमा आएको पहिलो दिनको सुरुवातमा यस कम्पनीको सेयर मूल्य केहि घटेको थियो । कारोबारको अन्त्यमा भने कम्पनीको सेयर मूल्य १।७३ प्रतिशतले बढेको छ ।
पुँजी बजारलाई बलियो बनाउन म्युचुअल फण्डको अबधारणा र आईपीओमा कोटा छुट्याएको थियो । तर म्युचुअल फण्डले आफुसँग भएको सेयर कारोबार खुलेकै दिन किनबेच गर्दा बजारमा झन नकारात्मक असर परेको हो ।
रिलायवलको कम्पनीको आज २४ करोड ५२ लाख ९३ हजार रुपैयाँ बराबरको ४ लाख ८६ हजार ९ सय ८६ कित्ता सेयर कारोबार भएको छ ।
आइतबार समग्र सेयर बजार मापन नेप्से परिसूचक ४२.१४ अंकले घटेर १९६४.९१ बिन्दुमा झरेको छ । आइतबार २ अर्ब २ करोड ८४ लाख ६५ हजार रुपैयाँ बराबरको सेयर कारोबार भएको छ ।
आज कारोबारमा आएको ११ कम्पनीको मात्र सेयर मूल्य बढेको छ । बाँकी २ सय १३ कम्पनीको सेयर मूल्य घटेको छ । कारोबारमा आएको एक कम्पनीको सेयर मूल्यमा सकारात्मक सर्किट लागेको छ ।
