काठमाडौं । चालु आर्थिक वर्षको सुरुवातसँगै बैंक तथा वित्तीय संस्थाले गर्ने कर्जा लगानी तथा निक्षेप संकलन दुबैमा गिरावट आएको छ । चालु आर्थिक वर्ष सुरु भएको ९ दिनमा बैंक तथा वित्तीय प्रणालीबाट १ खर्ब ४६ अर्ब रुपैयाँ निक्षेप बाहिरिदा २९ अर्ब रुपैयाँ कर्जा लगानी भएको छ ।
यसैगरी, चालु आर्थिक वर्ष सुरु भएदेखि हालसम्म वाणिज्य बैंकहरुको कुल निक्षेप २५ अर्ब रुपैयाँले घटेको छ, भने सोही कर्जा प्रवाहमा १९ अर्ब रुपैयाँले गिरावट आएको नेपाल राष्ट्र बैंकले जानकारी दिएको छ । साउन ९ गतेसम्म बैंक तथा वित्तीय संस्थासँग कुल निक्षेप ५६ खर्ब २१ अर्ब रुपैयाँ रहेको छ । असार मसान्तसम्म बैंक तथा वित्तीय संस्थासँग यस्तो निक्षेप ५७ खर्ब ६७ अर्ब रुपैयाँ रहेको थियो । यसैगरी, साउन ९ गतेसम्म बैंक तथा वित्तीयसंस्थाले ४८ खर्ब ५० अर्ब रुपैयाँ कर्जा लगानी गरेका छन् ।
बैंक तथा वित्तीय क्षेत्रले असार मसान्तसम्म ४८ खर्ब ७९ अर्ब रुपैयाँ कर्जा लगानी गरेको राष्ट्र बैंकले जानकारी दिएको छ । असार मसान्तको तुलनमा बैंकहरुको कर्जा निक्षेप अनुपात रेसियो (सिडि रेसियो) भने बढेको छ । असार मसान्तसम्म ८१.६५ प्रतिशत रहेको बैंकहरुको सिडि रेसियो साउन ९ गतेसम्म आउँदा ८३.२१ प्रतिशत पुगेको छ । राष्ट्र बैंकले स्थानीय तहको पैसा निक्षेपमा गणना गर्न दिएको सुविधा हटाएसँगै सीडी रेसियो बढ्न पुगेको हो । यसैगरी सो अबधिमा अन्तर बैंक ब्याजदर पनि बढेको छ । असार मसान्तसम्म ०.४४ प्रतिशत मात्र रहेको बैंकहरुको अन्तरबैंक ब्याजदर साउन ९ गतेसम्म आउँदा ६.२० प्रतिशत रहेको छ ।
