काठमाडौं । बिकासन्युजका संचालक एवं प्रधान सम्पादक रामकृष्ण पौडेललाई विवादास्पद व्यवसायी दुर्गा प्रसाईले ज्यान मार्ने धम्की दिएको भन्दै इकानोमिक मिडिया सोसाइटी नेपाल (ईम्सन) ले गम्भिर ध्यानाकर्षण भएको जनाएको छ । कुनै पनि विषयमा समाचार लेखेकै आधारमा मिडिया संचालक माथि ज्यान मार्ने धम्की दिईनु भत्सरना योग्य र आपत्तिजनक भएको ईम्सनद्वारा जारी विज्ञप्तिमा उल्लेख छ ।
‘शक्तिकेन्द्रहरुका आडमा विवादित अभिव्यक्ति र गतिबिधी गर्दै आईरहेका प्रसाईले इम्सनका संस्थापक अध्यक्ष समेत रहेका पौडेललाई समाचार लेखेकै आधारमा फोन गरेर ज्यान मार्ने धम्की दिनु भत्सर्ना योग्य र आपक्ति जनक छ’, इम्सनद्वारा जारी विज्ञप्तिमा भनिएको छ–‘सञ्चार माध्यमहरुमा प्रकाशित तथा प्रसारित सामग्रीहरुमा चित्त नबुझे आफ्ना कुरा राख्ने र कानुनी उपचारमा जाने व्यवस्थाहरु छन् । तर प्रसाईले प्रेस स्वतन्त्रताको विश्वव्यापी मान्यता, नेपालका मौजुदा ऐन कानुनहरुको बर्खिलाप हुने गरि ज्यान मार्ने धम्की दिनु भनेको प्रेस स्वतन्त्रताका विरुद्धमा मात्रै नभएर फौजदारी कानुन समेत आकर्षित हुने बिषय बन्न पुगेको छ ।’
संकास्पद पृष्ठभूमि, विवादित व्यवसाय र अभियानहरु चलाएर नेपाली समाजलाई नै बिथोल्ने प्रयास गरिरहेका प्रसाईमाथि आवश्यक छानविन गरि कानुनी कारवाहीको प्रक्रिया अघि बढाउन इम्सन नेपाल सरकार, गृह मन्त्रालयमार्फत नेपाल प्रहरीसमक्ष इम्सनको माग छ ।
