काठमाडौं । जेठ महिनामा सरकारले सेयर बजारका कारोबारी लगानीकर्ताबाट २६ करोड रुपैयाँ बराबरको राजस्व संकलन गरेको छ । जेठमा अल्पकालिन लगानीकर्ता तथा दीर्घकानिल लगानीकर्ताबाट सरकारले कुल २५ करोड ९५ लाख २३ हजार २३४ रुपैयाँ कर संकलन गरेको हो ।
सरकारले जेठ महिनामा अल्पकानिल लगानीकर्ताबाट मात्रै १२ करोड ८५ लाख ५ हजार ५३४ रुपैयाँ लाभ कर संकलन गरेको छ । यसैगरी, दीर्घकालिन लगानीकर्ताबाट जेठ महिनामा ९ करोड २ लाख ८३ हजार ६५४ रुपैयाँ कर संकलन गरेको सिडिएस एन्ड क्लियरिङ लिमिटेड (सीडीएससी) का प्रवक्ता सुरेश न्यौपाने जानकारी दिए ।
वैशाख महिनाको तुलनामा जेठ महिनामा सरकारले सेयर बजारबाट संकलन गर्ने कर बढेको छ । वैशाख महिनामा सरकारले १३ करोड ५४ लाख ८८ हजार ८९९ रुपैयाँ बराबर कर संकलन गरेको थियो । बैशाखमा सरकारले अल्पकालिन लगानीकर्ताबाट ६ करोड १२ लाख ५२ हजार ८३३ रुपैयाँ कर संकलन गरेको थियो भने दीर्घकालिन लगानीकर्ताबाट सरकारले ५ करोड ९९ लाख २७ हजार ३७३ रुपौयाँ कर संकलन गरेको थियो । वैशाखको तुलनामा जेठ महिनामा यस्तो कर १२ करोड ४० लाख ३४ हजार ३३५ रुपैयाँले बढेको सीडीएससीले जानकारी दिएको छ । यो रकम बैशाखको तुलनामा झण्डै दोब्बर हुन आउँछ ।
जेठ महिना सुरुभएसँगै सेयर बजार कारोबारमा पनि सुधार आउँदै गएको छ । जेठ महिनामा सेयर कारोबार नेप्से सूचकसँगै सेयर कारोबार रकम पनि बढेको छ । यस कारण सेयर बजारबाट उठ्ने राजस्व पनि बढेको न्यौपाने बताउँछन् । यसैगरी, अहिले बैंकिङ क्षेत्रमा पनि तरलताको अवस्था पहिलेभन्दा केहि सहज भएको छ । यसले गर्दा सेयर बजारमा कारोबार गर्ने लगानीकर्ताको संख्या बढ्दो छ ।
