काठमाडौं । विश्वभर आइटी क्षेत्र पछिल्लो समय लगानीका लागि आकर्षणको क्षेत्रको रुपमा रहेको छ । यस्तोमा नेपालमा पनि आइटी क्षेत्रमा लगानी आकर्षणसँगै लगानी विस्तार पनि हुँदै गएको छ । नेपालमा पछिल्लो समया स्वदेशी तथा विदेशी लगानीकर्ताले विभिन्न क्षेत्रसँगै आइटी क्षेत्रमा लगानी गरिरहेका छन् । यसैक्रममा १५ बर्षदेखि क्लाउड र स्टोरेज सर्भिस दिइरहेको डाटा हवले थप साढे २६ करोड रुपैयाँ लगानी थप्ने भएको छ । डाटा सेन्टर विस्तारका लागि कम्पनीले थप २६ करोड ६० लाख रुपैयाँ लगानी थप्ने प्रतिवद्धता उद्योग विभागसामु गरेको हो ।

नेपालमा आइटी क्षेत्रमा अवसर रहेको भन्दै सरकारले चालु आर्थिक बर्षको बजेटमा आईटी क्षेत्रमा लगानीको सीमा हेरफेर गर्ने उल्लेख गरेको छ । यसैका कारण आगामी आवमा आइटी क्षेत्रमा लगानी थप विस्तार हुने बताइएको छ । विभागमा थप लगानी थप्ने प्रतिवद्धता जाहेर गरेको कम्पनीले लगानी थप्नका लागि विभागबाट गत आइतबार स्वीकृति पाएको छ । उद्योग विभागले दिएको जानकारी अनुसार कम्पनीले शतप्रतिशत स्थानीय लगानीमा थप ५ हजार र्याकसहितको डाटा स्टोरेज सर्भर थप्ने भएको हो ।

कम्पनीले हालसम्म काठमाडौं र बुटवलमा डाटा सेन्टर स्थापना गरेर क्लाउड सेवा दिँदै आएको छ । कम्पनीले हालसम्म ३ सय बढी कम्पनीहरुलाई होस्टिङ सेवा र दर्जन बढी कम्पनीहरुलाई क्लाउड सेवा दिँदै आएको छ । कम्पनीको बुटवल र काठमाडौंमा निर्मित डाटा सेन्टरमार्फत गैरसरकारी संस्थाहरुलाई पनि सेवा दिँदै आएको छ । कम्पनीले सर्वप्रथम सन २०१२ मा काठमाडौंमा पहिलो व्यवसायिक डाटा सेन्टर संचालनमा ल्याएको थियो ।

त्यसपश्चात सन २०१५ मा बुटवलमा आपतकालिन रिकभरी साइटका रुपमा अर्काे डाटा सेन्टर स्थापना गरिएको थियो । त्यसको दुई बर्षपछि डाटा हवले नेपालमा क्लाउड सर्भिस दिन सुरु गरेको थियो । त्यसयता कम्पनीको क्लाउड सेवा प्रयोग गर्ने सेवाग्राही थपिँदै आएका छन् । कम्पनीको सेवा नेपालका ३३ बैंक तथा वित्तीय संस्था, १६ ओटा बीमा कम्पनी, २९ आइटी कम्पनी र २७ फिनटेक कम्पनीले प्रयोग गरिरहेका छन् ।

नेपालमा चालु आर्थिक बर्षको हालसम्म विभिन्न १२ कम्पनीहरुले ९४ करोड रुपैयाँ बढीको लगानी प्रतिवद्धता जाहेर गरेका छन् । यस्तै हालसम्म नै यो क्षेत्रमा कुल १ सय ५ कम्पनीमार्फत ८ अर्ब ७० करोड ९८ लाख रुपैयाँ बराबरको लगानी प्रतिवद्धता आएको छ ।

यस अवधिमा आइटी क्षेत्रका ठुला ३ परियोजनाबाट ३ अर्ब ३४ करोड, मझौला १२ परियोजनामार्फत २ अर्ब ७३ करोड र ९० परियोजनामार्फत ३ अर्ब ६३ करोड रुपैयाँ बराबरको लगानी प्रतिवद्धता आएको छ । चालु आवको हालसम्म भने आइटी क्षेत्रका मझौला ३ परियोजनामार्फत ६२ करोड ६० लाख र साना ९ परियोजनामार्फत ३१ करोड ६४ लाख रुपैयाँ बराबरको लगानी प्रतिवद्धता विभागमा आएको छ ।