काठमाडौं । नेपाल भियतनाम उद्योग वाणिज्य संघले मुलुकको धार्मिक पर्यटन प्रर्वद्धनका लागि विभिन्न कार्यक्रम गर्ने जनाएको छ । नेपालमा भियतनामी पर्यटकको अपार सम्भावना रहेको भन्दै संघले विशेषगरी बुद्ध जन्मस्थल लुम्बिनी केन्द्रित कार्यक्रमहरु आयोजना गर्ने जनाएको छ । संघका अध्यक्ष दिपक मलहोत्राको अध्यक्षतामा बसेको कार्यसमिति बैठकले पर्यटनलगायत द्विपक्षीय सहकार्यका लागि ठोस कार्ययोजना अघि बढाउन विभिन्न समितिहरु गठन गरेको छ ।
जसअनुसार सर्वोत्तमलाल श्रेष्ठको संयोजकत्वमा पर्यटन प्रवर्दन समिति, गोविन्द थपलियाको संयोजकत्वमा कृषि सुधार तथा प्रवर्दन समिती, सञ्जीव तुलाधरको संयोजकत्वमा वाणिज्य समिति गठन गरिएको छ । बैठकले विदुषी राणाको संयोजकत्वमा उद्योग तथा लगानी समिति, नवीन सारुको संयोजकत्वमा शिक्षा, संस्कृति तथा सामाजिक समिति गठन गरेको संघका महासचिव गोपालदास मानन्धरले बताए ।
संघको साधारणसभा जेठको अन्तिम साता गर्ने कार्यक्रम जनाईएको छ । साधारणसभा सम्पन्न गर्न उपाध्यक्ष सुरेशमान श्रेष्ठको संयोजकत्वमा सम्मेलन आयोजक समिति बनाउने निर्णय गरिएको छ । साधारण सभाबाट यस संस्थाले आफ्नो विधान अनुरुप कार्यकालमा गर्नुपर्ने प्रतिवद्धताहरु समेत तय गरेको छ । यस्तै संघले कार्यक्षेत्रलाई थप फराकिलो बनाइ संस्थामा आवद्ध सदस्य संख्यालाई विस्तार गर्ने योजना अघि सारेको छ । संघको साधारण तथा आजीवन सदस्य विस्तार गर्ने अभियान चलाउन विधान संशोधन गर्ने निर्णय पनि गरिएको छ ।
संघले स्थापनाकालदेखि नै मुलुकको सामाजिक, आर्थिक, कृषि, व्यापार–व्यवसाय तथा पर्यटन क्षेत्रको विकास र प्रवद्र्धनमा विशेष योगदान पुर्याउँंदै आएको अध्यक्ष मलहोत्राले बताए । ‘संघको प्रमुख उद्देश्य नै मुलुकको पर्यटन क्षेत्रको विकास गर्नु रहेकोले नेपालमा भियतनामी पर्यटकको आगमन वृद्धि गर्न विशेषतः बुद्ध जन्मेको भूमी लुम्बिनीमा निर्माण भएको गौतमबुद्ध अन्तर्राष्ट्रिय विमानस्थलमा सिधा उडानका लागि सम्बन्धित निकायहरुसंँग समन्वय गरिरहेको अध्यक्ष मलहोत्राले बताए ।
संघले आपसी सहकार्यमा कृषि क्षेत्रको विकास गर्ने तथा दुई देशबीच भइरहेका आर्थिक विकासका कार्यक्रमहरुका सम्बन्धमा अनुभव आदानप्रदान गर्न द्विपक्षीय भ्रमणको कार्यक्रम गर्ने मलहोत्राले बताए । भियतनामी लगानीका भित्र्याउनका लागि अध्ययन र अनुसन्धानका निमित्त नेपाली प्रतिनिधिमण्डलको भियतनाम भ्रमण गर्ने र भियतनाम चेम्बर्स अफ कमर्शका प्रतिनिधिहरुलाई नेपाल भ्रमणका लागि निमन्त्रणा दिने निर्णय पनि उक्त बैठकले गरेको मलहोत्राले जनाए ।
