काठमाडौं । नेपालकै पहिलो सडक सुरुङमार्गका रुपमा तयार हुँदै गरेको नागढुंगा नौविसे सुरुङमार्गको काम सोचेअनुरुप अगाडि बढन सकेको छैन् । ४४ महिनामा सम्पन्न गर्नेगरी २०७६ को कार्तिकमा काम सुरु गरिएको सुरुङमार्ग २०८० को असारसम्म सम्पन्न गर्ने लक्ष्य राखिएको भएपनि अहिलेसम्म आधा काम पनि सम्पन्न भएको छैन् ।
उक्त आयोजनाको हालसम्मको भौतिक प्रगति लगभग ४७.९० प्रतिशत मात्रै छ । अर्थात आयोजनाको अझै आधाभन्दा बढी काम बाँकी नै छ । आयोजनाका अनुसार काम सुरु भएको ३८ महिनासम्म आयोजनाको मुख्य सुरुङमार्ग १ हजार ७ सय ८२ मिटरमात्रै खनिएको छ । निर्माण सम्पन्न गर्नेबेलासम्म २ हजार ६ सय ८८ मिटर खनिसक्नुपर्ने उक्त सुरुङमार्गको प्रगति पनि भनेबमोजिम भईसकेको छैन ।
कोरोना महामारी र जग्गा मुआब्जाको विवादका कारण काम सुस्त भइरहेको बताएको आयोजनाले सहायक सुरुङमार्ग पनि हालसम्म जम्मा २ हजार ४६ मिटर मात्रै खनेको छ । आयोजनाका अनुसार सहायक र मुख्य गरी सुरुङमार्ग मात्रै ५ हजार ४ सय ९९ मिटर खन्नुपर्नेमा हालसम्म यसको प्रगति ७३ दशमलव ३ प्रतिशत अर्थात ४ हजार २९ मिटरमात्र छ ।
देशका अन्य भूभागबाट संघीय राजधानी काठमाडौंको आवतजावत सहज बनाउन निर्माण भइरहेको सुरुङमार्गमा दुईओटा सुरुङमार्ग हुनेछन् । एउटामा सवारीसाधन गुड्नेछन् भने अर्काे ईभ्याकुएसन्सँगै सुरुङभित्र विग्रेका सवारीसाधनलाई सुरक्षितसँग बाहिर ल्याउने काममा प्रयोग गरिनेछ ।
आयोजनाले दुवै सुरुङलाई जोड्नका लागि सुरुङमार्गको बीचबीचमा क्रस प्यासेज पानि बनाउँदै आएको छ । काठमाडौं र नागढुंगा दुबैतर्फबाट खन्न सुरु गरिएको सुरुङमार्गमा हालसम्म क्रस प्यासेजका लागि १ सय २८ मिटर खन्नुपर्नेमा ७४.२० मिटर खनिएको छ । वर्किङ अडिटको काम भने सम्पन्न भइसकेको आयोजनाले जानकारी दिएको छ ।
आयोजनालाई सबैभन्दा बढी समस्या भने काठमाडौंतर्फ सुरुङमार्ग र मुख्य सडक जोड्ने एप्रोच बनाउने काममा देखिएको आयोजना प्रमुख माधवप्रसाद अधिकारी बताउँछन् । उनका अनुसार काठमाडौंतर्फ मुख्य सडक र सुरुङमार्गको अन्तिम विन्दु जोड्ने गरी फ्लाईओभर बनाउन लागिएको छ । उक्त फ्लाईओभर बनाउन आवश्यक स्थानको मुआव्जा लिनका लागि केही स्थानीयले नमानिरहेको अवस्था छ ।
फ्लाईओभरका लागि आवश्यक जग्गामध्ये हालसम्म ९५ प्रतिशत जग्गाको एकिन भएर २ ओटा फाउन्डेसन पनि हालिसकिएको छ । तर, जग्गाधनीलाई बुझाउनुपर्ने मुआब्जा भने अझै बुझाउन नसकिएको आयोजना प्रमुख अधिकारी बताउँछन् । उनका अनुसार गत असोजमै मुआब्जा वितरणका लागि अर्थमन्त्रालयसँग रकम निकासीका लागि आग्रह गरिएपनि अझै मन्त्रालयले मुआब्जाका लागि रकम निकासा गरिसकेको छैन ।
फ्लाईओभर निर्माणका लागि आयोजनाले २ ओटा फाउन्डेसनसँगै २ ओटा सवस्ट्रक्चर पनि तयार पारिसकेको छ । यस्तै आयोजनाले सुरुङमार्गका लागि आवश्यक अन्य भौतिक संरचना जस्तै कल्भर्ट, अन्डरपास, ओभरपास र पुलको निर्माण भने सम्पन्न गरिसकेको छ । आयोजनालाई सुरुङसँगै एउटा ओभरपास, ३ ओटा अन्डरपास र ४ ओटा बक्स कल्भर्टबनाउनुपर्ने थियो ।
आयोजनाले समयमै अर्थात आगामी असारसम्म काम सम्पन्न नहुने देखिएपछि सडक विभागलाई म्याद बढाउनका लागि सिफरिस गरिसकेको आयोजना प्रमुख अधिकारीले बिजखबरलाई जानकारी दिए । ‘कोरोनालगायतका कारणले काममा ढिलाई भयो, यसले समयमै काम सम्पन्न हुनेमा बाधा उत्पन्न गर्याे,’ उनले भने, ‘यसको समय लम्ब्याउनुपर्ने भएकाले हामीले समय लम्ब्याउन सडक विभागलाई सिफारिस पठाएका छौं ।’
