काठमाडौँ । नव नियुक्त प्रधानमन्त्री पुष्पकमल दाहाल ‘प्रचण्ड’ को शपथसँगै आज ९सोमबार० नै सानो आकारको मन्त्रिपरिषद् गठनको तयारी भएको छ ।
पहिलो चरणमा एमाले र माओवादीबाट मात्र मन्त्री नियुक्त हुने र त्यसपछि साना दलले निर्णय गरेपछि मन्त्रिपरिषद्लाई पूर्णता दिने नयाँ गठबन्धनको तयारी छ । दिउँसो ४ बजे प्रधानमन्त्रीको शपथअघि नयाँ गठबन्धनबीच छलफल हुँदैछ । एमाले, माओवादीलगायतका दलको आन्तरिक बैठक पनि बस्दै छ ।
एमालेले विष्णु पौडेलको नेतृत्वमा सरकारमा जाने तयारी गरेको छ । यसअघि पौडेल केपी शर्मा ओलीको पछिल्लो सरकारमा करिब ९ महिना अर्थमन्त्री बनेर सफल अर्थमन्त्रीको रुपमा बाहिरिएका थिए । यस पटक पनि उनले अर्थमन्त्री पाउने सम्भावना रहेको जनाइएको छ ।
नारायणकाजी श्रेष्ठलाई उपप्रधानमन्त्री बनाउने माओवादीको निर्णय
नेकपा माओवादी केन्द्रबाट नारायणकाजी श्रेष्ठ उपप्रधानमन्त्री बन्ने भएका छन् । पार्टीको आज (सोमबार) बिहान बसेको पदाधिकारी बैठकले श्रेष्ठलाई उपप्रधानमन्त्री बनाउने निर्णय गरेको हो । तर मन्त्रालय टुङ्गो लाग्न भने बाँकी छ । श्रेष्ठ राष्ट्रिय सभाका सदस्य हुन् । यसअघि उनी परराष्ट्र र गृहमन्त्री भइसकेका छन् ।
‘आज बसेको पदाधिकारी बैठकले हाम्रो पार्टीबाट वरिष्ठ उपाध्यक्ष नारायणकाजी श्रेष्ठलाई उपप्रधानमन्त्रीको जिम्मेवारीसहित सरकारमा पठाउने निर्णय गरेको छ, आज सानो आकारको मन्त्रिमण्डल बन्छ । त्यसमा हाम्रो पार्टीबाट एक जना पठाउने निर्णय गरेका हौँ’, माओवादी केन्द्रका प्रवक्ता कृष्णबहादुर महराले भने, ‘मन्त्रालयको टुंगो भने अहिले ११ बजे बस्ने सत्ता गठबनधनको बैठकले निर्णय गर्नेछ ।’
