काठमाडौं । अन्तर्राष्ट्रिय बजारमा कच्चा तेलको मूल्यमा भारी गिरावट आएको छ । रुसले तेलको आपूर्ति रोक्ने धम्की दिएको भएपनि तेलको मूल्य भने तल आृर्लिएको हो । डलरको भाउ बढ्नु र माग घट्ने डरले तेलको भाउ घटेको हो ।
अमेरिकी बेन्चमार्क वेस्ट टेक्सास इन्टरमिडिएट (डब्ल्यूटीआई) प्रति ब्यारेल ८५ डलरभन्दा तल झरेको छ भने ग्लोबल ब्रेन्ट बेन्चमार्क ९० डलरभन्दा तल कारोबार भइरहेको छ ।
बुधबार डलरको भाउ अहिलेसम्मकै उच्च विन्दुमा पुगेको छ । विश्वभरका केन्द्रीय बैंकहरूले मुद्रास्फीति नियन्त्रण गर्न ब्याजदर बढाइरहेका छन् । विश्वका धेरै देशहरू मन्दीको चपेटामा पर्न सक्ने भन्दै लगानीकर्ता डराइरहेको अवस्था छ ।
चीनमा महामारी फैलिन नदिन कडा लकडाउन गरिएको छ र यसले मागलाई असर गरेको छ । ओपेक राष्ट्रहरूले उत्पादन कटौती गर्ने निर्णय गरेसँगै कच्चा तेलको मूल्य केही बढेको थियो । तर, उनीहरुले आफ्नो निर्णयको आधार गुमाएका छन् । साउदी अरेबियाले एशिया र युरोपमा आफ्ना ग्राहकका लागि अर्को महिनाको कन्साइनमेन्टको मूल्य घटाएको छ ।
नेपालमा पेट्रोल र डिजेलको मूल्य
युक्रेनमा रुसको आक्रमणपछि अन्तर्राष्ट्रिय बजारमा कच्चा तेलको मूल्य प्रति ब्यारेल १३९ डलर पुगेको थियो । जुन २००८ यताकै उच्च रहेको थियो । जसका कारण नेपालमा पनि इन्धनको मूल्य उच्च रुपमा वृद्धि भएको थियो । तर पछिल्लो समय अन्तराष्ट्रिय बजारमा मूल्य निकै तल आइपुगेपनि नेपालमा भने इन्धनको मूल्य घटेको छैन् ।
केही समयदेखि नेपाली बजारमा पेट्रोलको मूल्य स्थिर रहेको छ भने डिजेल र मट्टीतेलको मूल्य भने थप महँगो भएको छ । तर, कच्चा तेलको मूल्य जनवरी यताकै न्यून स्तरमा आएको वर्तमान अवस्थामा आगामी दिनमा देशमा पेट्रोल र डिजेलको मूल्य घट्न सक्ने आँकलन गर्न सकिन्छ ।
नेपाल आयल निगमले भारतीय आयल कर्पोरेशनबाट मूल्य घटेर आएपनि समग्रमा घाटा कायमै रहेको जनाउदै तत्काल मूल्य नघटाउने बताउादै आएको छ । निगमले गत बिहीबार मात्रै डिजेल र मट्टीतेलको मूल्य ६–६ रुपैयाँ बढाएको थियो। अहिले नेपाली बजारमा डिजेल र मट्टीतेलको मूल्य प्रतिलिटर १ सय ७८ रुपैयाँ पुगेको छ भने पेट्रोल प्रतिलिटर १८१ रुपैयाँ रहेको छ ।
