काठमाडौं। चितवनको भरतपुर महानगरपालिकामा गठबन्धनबाट उम्मेदवार बनेकी माओवादी केन्द्रकी रेनु दाहाल र नेकपा एमालेका विजय सुबेदीबीच प्रतिष्पर्धा देखिएको छ ।
पछिल्लो अपडेट अनुसार ९३७० मतगणना हुदा एमालेका विजय सुबेदी १४ मतले अगाडी रहेका छन् । सुबेदीले ३६६७ मत पाएका छन् भने रेनु दाहालले ३६५३ मत पाएकी छन् ।
त्यस्तै काँग्रेसका बागी उम्मेदवार जगन्नाथ पौडेलले १४१३ मत पाएका छन् । त्यस्तै उपमेयरमा चित्रसेन अधिकारीले ४१५० पाएर अगाडी रहेका छन् भने एमाले गठबन्धनकी राप्रपाकी हिमला गुरुङले २८८६ मत प्राप्त गरेकी छन् ।
भरतपुरमा अहिलेसम्म वडा नम्बर १ र २ को मतगणना सकिएको छ भने दुवै वडामा काँग्रेस विजयी भएको छ । हाल वडा नम्बर ३ को गणना भइरहेको निर्वाचन कार्यालयले जानकारी दिएको छ । यस वडाको वडाअध्यक्षमा भने एमालेका उम्मेदवार अगाडी रहेका छन् ।
पोखरा महानगरमा अग्रता बढाउदै गठबन्धन
स्थानीय तह सदस्य निर्वाचन–२०७९ अन्तर्गत जारी मतगणनामा पोखरा महानगरपालिकामा सत्ता गठबन्धनका उम्मेदवारले अग्रता बढाएका छन् । जारी मतगणनामा आठ हजार ६९३ मत गणना हुँदा गठबन्धनबाट प्रमुख पदका उम्मेदवार नेकपा (एकीकृत समाजवादी_ का धनराज आचार्यले तीन हजार ४६५ मत प्राप्त गरेका छन् ।
त्यसैगरी नेकपा (एमाले) का प्रमुख पदका उम्मेदवार कृष्णबहादुर थापाले तीन हजार १०८ मत प्राप्त गरेका छन् । गठबन्धनका आचार्यले ३५७ मतले अग्रता हासिल गरेका छन् । उपप्रमुखमा गठबन्धनबाट नेपाली कांग्रेसका उम्मेदवार कोपिला रानाभाट तीन हजार ६०० मतसहित अघि छन् भने एमालेकी मञ्जुदेबी गुरुङले तीन हजार ५७५ मतसहित उनलाई पछ्याएकी छन् ।
महानगरको वडा नं १ मा एमालेले विजय भएको छ । वडा नं १ मा एमालेका वडाअध्यक्ष पदका उम्मेदवार साहारा प्रधानले एक हजार १४५ मत ल्याई विजय भए भने उनका प्रतिस्पर्धी कांग्रेसका वडाध्यक्षका उम्मेदवार सीता गुरुङले एक हजार १०४ मत ल्याएकी छन् ।
वडा नं २ मा कांग्रेसका तर्फबाट वडा अध्यक्षका उम्मेदवार दिवशमान प्रधानाङ्ग एक हजार ८१९ मतसहित विजय भए भने उनका प्रतिस्पर्धी एमालेका दीपक शाहीले एक हजार ७९२ मत प्राप्त गरे ।
