काठमाडौं । आगामी आर्थिक बर्षको बजेट ल्याउने समय नजिकिदै जाँदापनि चालु आर्थिक बर्ष २०७८÷७९ को बजेट देशभरका ४ स्थानीय तहले अझै अपडेट गरेका छैनन् । संघीय मामिला तथा सामान्य प्रशासन मन्त्रालयका अनुसार कुल ७ सय ५३ स्थानीय तहहरुमध्ये मधेश प्रदेशका ४ स्थानीय तहले बजेट अपडेट गर्न बाँकी छ ।

मन्त्रालयका अनुसार रौतहट जिल्लाका २, पर्सा र धनुषा जिल्लाका एक एक नगरपालिका रहेका छन । रौतहटका बौधीमाई नगरपालिका र गरुडा नगरपालिका, पर्साको पोखरीया नगरपालीका र धनुषाको जनकपुर उपमहानगरपालिकाले अझै पनि बजेट पेश नगरेका हुन । देशभर कुल ७ सय ५३ स्थानीय तहहरुमा प्रदेश नम्बर १ का १ सय ३७, बागमती प्रदेशका १ सय १९, गण्डकी प्रदेशका ८५, लुम्बिनी प्रदेशका १ सय ९, कर्णाली प्रदेशका ७९, सुदूरपश्चिम प्रदेशका ८८ वटै स्थानीय तहले बजेट पेश गरिसकेका छन् ।

तर, मधेस प्रदेशका १ सय ३६ स्थानीय तहमध्ये ४ स्थानीय तहको बजेट पेश नभएको देखिन्छ । स्थानीय सरकार सञ्चालन ऐन, २०७४ तथा अन्तर–सरकार वित्त व्यवस्थापन ऐन, २०७४ अनुसार गाउँ कार्यपालिका र नगर कार्यपालिकाले प्रत्येक वर्ष असार १० गतेभित्र आगामी आर्थिक बर्षका लागि राजस्व र व्ययको अनुमान सम्बन्धित गाउँसभा र नगरसभामा पेस गर्नुपर्ने व्यवस्था छ ।

हालसम्म ७ सय ४९ स्थानीय तहले आफ्नो बजेट सम्बन्धित गाउँसभा÷नगरसभामा पेश गरेर मन्त्रालयको पोर्टलमा अपडेट गरेको देखिएपनि बाँकी ४ स्थानीय तहले भने अझैपनि मन्त्रालयको पोर्टलमा अपडेट नगरेको मन्त्रालयका प्रवक्ता वसन्त अधिकारीले बताए । यसरी मन्त्रालयको वेवसाईटमा अपडेट नहुदा सम्म बजेट नै नल्याएको भन्ने जनतामा भ्रम पर्न जाने उनको भनाई छ । हालसम्म बजेट पेश नगरेका स्थानीय तहका प्रतिनीधीसंग बजेट पेश नहुनुको कारणबारे बुझ्दा बजेट पास भई आधा भन्दा बढि खर्च समेत भईसकेको बताए ।

तर, यसरी ती स्थानीय तहले आफुले बजेट पेस गरेको कुरा अनलाईन पोर्टलमा अपडेट गराउनु जरुरी देखिन्छ । मन्त्रालयका प्रवक्ताले जवसम्म संघीय मामिला तथा सामान्य प्रशासन मन्त्रालयको वेबसाईटमा बजेट पेश भएको देखिदैन तवसम्म बजेट नल्याएको भन्ने बुझिने उनले बताए । उनले यो स्थानीय तहको कुरा हो, स्थानीय तह एक छुट्टै सरकार भएको र उक्त कुरा अपडेट गराउने अधिकार पनि स्थानीय तहसंगै भएको जानकारी दिएका छन ।