काठमाडौं । सरकारले सवारी साधनमा अत्याधुनिक इम्बोस्ड नम्बर प्लेट जडानका लागि जिम्मा दिएको पुरानै कम्पनीको म्याद थप गरेको छ । यातायात व्यवस्था विभागले गत जेठ महिनामा ५ बर्षको म्याद सकिएको बंगलादेश र अमेरिकाको ज्वाईन्ट भेन्चरको कम्पनी डेकाटुर टाइगरको म्याद २८ महिना थप गरेको हो । विभागका अनुसार कम्पनीले अबको २८ महिनामा २५ लाख सानाठूला सवारीसाधनमा इम्बोस्ड नम्बर प्लेट छापेर जडान गर्नु पर्नेछ ।

सरकारले विस २०७३ जेठ १७ गते डेकाटुर टाईगरसँग ५ बर्षमा २५ लाख सवारीसाधनमा इम्बोस्ड नम्बर प्लेट जडान गर्नेगरी सम्झौता गरेको थियो । तर, सम्झौता भएको ५ बर्षमा विभिन्न अड्चनका कारण कम्पनीले ४ हजार सवारीसाधनमा मात्रै इम्बोस्ड नम्बर प्लेट जडान गरेको छ । यसबीचमा कम्पनीबिरुद्ध सर्वाेच्चमा इम्बोस्ड नम्बर प्लेट नेपाली भाषामा हुनुपर्ने भन्दै रिट परेपछि लामो समय सर्वाेच्चबाट आदेश नआउँदा थप ढिलाई भएको थियो । गत बर्ष मात्रै सर्वाेच्चले अंग्रेजी भाषा नै प्रयोग गर्न सकिनेगरी आदेश दिएपछि कम्पनीले गत बर्षको साउनदेखि काम अघि बढाएको थियो ।

यातायात व्यवस्था विभागका अनुसार हालसम्म २२ देखि २३ हजार सवारीसाधनमा यस्तो इम्बोस्ड नम्बर प्लेट जडान गरिसकिएको छ । यस्तै ६० हजार बढी प्लेट छापेर तयार भइसकेको विभागका महानिर्देशक नमराज घिमिरेले बिजखबरलाई जानकारी दिए । कम्पनीसँग सम्झौता भएकै समयमा सरकारले डेकाटुर टाइगर कम्पनीलाई ४ अर्ब ७८ करोड ७७ लाख रुपैयाँ भुक्तानी गर्ने सम्झौतामा उल्लेख छ । यस्तै सम्झौतामा काम नभएपनि उक्त कम्पनीले कुल रकमको ९५ प्रतिशत अर्थात ४ अर्ब ५४ करोड २ लाख रुपैयाँ लिन पाउनेसमेत उल्लेख छ ।

कम्पनीले विस २०७४ साल भदौदेखि सम्झौताअनुरुप सवारीसाधनमा इम्बोस्ड नम्बर प्लेट वितरण सुरु गरेको थियो । लगभग ६ महिनासम्म कम्पनीले प्रिन्ट मेशिन राखेर निजी तथा सरकारी गरी ३ हजार ९ सय ४६ सवारीसाधनमा इम्बोस्ड नम्बर प्लेट जडान गरेको थियो । तर, इम्बोस्ड नम्बर प्लेट नेपालीमा हुनुपर्ने भन्दै सर्वाेच्चमा रिट परेपछि जडान गर्ने काम स्थगित भएको थियो । करिव २ बर्षसम्म विचाराधीन रहेको मुद्दा सर्वाेच्चले सल्टाएपछि मात्रै विभागले गत बर्षको साउन १ गतेदेखि इम्बोस्ड नम्बर प्लेट वितरण गर्नेगरी सूचना निकालेको थियो । त्यसपछि पनि दोस्रो चरणको लकडाउनलगायतका बाधाका कारण इम्बोस्ड नम्बर प्लेट वितरणमा अन्यौलता हुँदै आएको थियो ।

२८ महिना थपियो म्याद

कम्पनीको म्याद गत जेठ महिनामा सकिएपछि यातायात व्यवस्था विभागले पुनः २८ महिनाका लागि म्याद थप गर्दै कम्पनीलाई नै इम्बोस्ड नम्बर प्लेट छाप्ने जिम्मा दिएको हो । विभागका महानिर्देशक नमराज घिमिरेका अनुसार कम्पनीलाई ५० प्रतिशत समय म्याद थप्न पाइने व्यवस्थाअनुसार म्याद थपिएको हो । यस अवधिमा कम्पनीले जसरी पनि ३५ लाख सवारीसाधनमा प्लेट जडान गर्ने प्रतिवद्धता जनाएपछि पनिे म्याद थपिएको उनले जानकारी दिए । कम्पनीले यस अवधिमा ३ सिफ्टमा काम गराएर भएपनि नम्बर प्लेट छाप्ने प्रतिवद्धता दिएको छ । विभागले पनि यस अवधिमा २५ लाख सवारीसाधनमा जसरी पनि इम्बोस्ड नम्बर प्लेट जडान गर्ने रणनीति बनाएको महानिर्देशक घिमिरेले बताए ।

कसरी हुन्छ वितरण ?

यातायात व्यवस्था विभागले मंसिर १ गतेदेखि नै सबै सवारीसाधनमा जडान गर्नुपर्ने इम्बोस्ड नम्बर प्लेट भने विभागले नै जडान गरिदिनेछ । जसका लागि सेवाग्राहीले विभागको वेबसाईटमार्फत फारम भरेर आफ्नो पालो अनुसार विभागमा उपस्थित हुनुपर्छ । सेवाग्राहीले बुझाएको डकुमेन्टअनुसार विभागको डाटा मिलेमा विभागले सेवाग्राहीलाई यातायात कार्यालयले दिएको नम्बरको इम्बोस्ड नम्बर प्लेटमा पर्सनल डाटा राख्नेछ र दिनेछ ।

कति पर्छ मूल्य ?

यातायात व्यवस्था विभागले इम्बोस्ड नम्बर प्लेट जडान गर्नका लागि सवारीसाधनलाई वर्गीकरण गरी मूल्य तोेकेको छ । विभागले २ पाँग्रे सवारीसाधनका लागि २ हजार ५ सय रुपैयाँ तोकेको छ भने ३ पाँग्रे सवारीसाधनका लागि २ हजार ९ सय रुपैयाँ तोकेको छ । यस्तै ४ पाँग्रे साना सवारीसाधनका धनीहरुले भने इम्बोस्ड नम्बर प्लेट जडान गरेवापत ३ हजार २ सय रुपैयाँ राजश्व बुझाउनुपर्ने हुन्छ । यस्तै ठुला सवारीसाधनका धनीहरुका लागि भने ३ हजार ६ सय रुपैयाँ तोकिएको छ ।

विभागले उल्लेखित राजस्व बुझाउने स्थानहरुको पनि टुँगो लगाएको छ । विभागका अनुसार २ पाँग्रे सवारीसाधनको धनीहरुले तोकिएको राजस्व यातायात व्यवस्था कार्यालय गुर्जुधारामा रहेको ग्लोबल आईएमई बैंकको शाखामा विभिन्न कागजातसहित बुझाउनुपर्नेछ । यस्तै अन्य सवारीसाधनको हकमा भने ललितपुरको एकान्तकुना र यातायात व्यवस्था कार्यालयमा रहेको राष्ट्रिय वाणिज्य बैंकको शाखामा जम्मा गर्न सक्नेछन् ।

कहाँबाट जडान गर्न सकिन्छ ?

सवारीधनीहरुले राजस्व बुझाएपछि आफ्ना सवारीमा इम्बोस्ड नम्बर प्लेट जडान गर्ने गरिन्छ । त्यसका लागि विभागले छुट्टाछुट्टै स्थानहरु तोकेको छ । विभागका अनुसार २ पाँग्रे सवारीसाधनका धनीहरुले आफ्ना सवारीमा इम्बोस्ड नम्बर प्लेट राख्न यातायात व्यवस्था कार्यालय गुर्जुधारा जानुपर्नेहुन्छ ।

यस्तै ३ पाँग्रे र साना तथा ठुला, मझौला सवारीसाधन धनीहरुले भने सवारी परिक्षण कार्यालय टेकुमा गएर इम्बोस्ड नम्बर प्लेट जडान गर्न सक्नेछन् साथै ठुला ४ पाँग्रे सवारीसाधका लागि ईम्बोस्ड नम्बर प्लेट जडान गर्ने सुविधा यातायात व्यवस्था कार्यालय टेकुमा गरिएको छ । यस्तै सरकारी सवारीसाधनमा इम्बोस्ड नम्बर प्लेट जडान गर्ने काम विभागको कार्यालय मीनभवनमै गरिने विभागले जानकारी दिएको छ ।

बुझाउनुपर्ने कागजात

सवारीधनीले आफ्नो सवारीसाधनमा इम्बोस्ड नम्बर प्लेट जडान गर्न कर चुक्ता गरेको अनिवार्य गरिएको छ । साथै कर चुक्ता सम्बन्धी अद्यावधिक कागजात, नम्बर प्लेट जडानका लागि राजस्व तिरेको भौचर, अनलाईन आवेदन दिनेबेला भरेका कागजातका साथै अनलाईन आवेदनको प्रिन्ट पनि इम्बोस्ड नम्बर प्लेटसमेत बुझाउनुपर्ने हुन्छ ।

अब राजस्व पनि घरैबाट

विभागले हाल इम्बोस्ड नम्बर प्लेटका लागि फारम भर्ने सिस्टम पनि अपग्रेड गर्ने भएको छ । हाल यो सिस्टममार्फत सेवाग्राहीले डकुमेन्ट र राजस्व तिर्न सक्ने सुविधा राखिएको छैन । अब नयाँ अपग्रेड हुने सिस्टममा भने राजस्व तिर्न सक्ने र बिलबुक, भन्सारको प्रज्ञापन पत्र, लाईसेन्स, नागरिकतालगायत कागजातहरु पनि घरैबाट दिन पाईने सुविधा थपिने भएको छ ।