काठमाडौं । हुलास इन्फ्राले पर्सा जिल्लामा डेढ अर्ब बढी लगानीमा फलामजन्य निर्माण सामग्रीको उद्योग स्थापना गर्ने भएको छ । पर्सा जिल्लाको विन्दावासिनी गाउँपालिका २ स्थित बहुअर्वाभाठामा उद्योग स्थापना हुनेगरी हुलास इन्फ्राले उद्योग विभागमा १ अर्ब ५७ करोड ४० लाख रुपैयाँ बराबरको लगानी प्रतिवद्धता जनाएको हो ।
कम्पनीले बार्षिक ८ हजार १ सय मेट्रिकटन एमएस स्ट्रक्चर, ४ हजार ५ सय मेट्रिकटन जिआई स्ट्रक्चर र १० हजार मेट्रिकटन ग्याल्भनाईज्ड उत्पादन गर्नेगरी लगानी प्रतिवद्धता जनाएको हो । विभागले उपलब्ध गराएको तथ्यांकअनुसार कम्पनीले कुल पुँजी १ अर्ब ५७ करोड ४० लाख रुपैयाँ राखेर १ सय २३ जनालाई रोजगारीको अवसरसमेत सिर्जना गर्ने बताएको छ ।
२५ सय केभिए विद्युत खपत गर्नेगरी लगानी प्रतिवद्धता जनाएको कम्पनीले अस्थायी घर तथा वासस्थानका लागि आवश्यक फलामका स्ट्रक्चरहरु निर्माण गर्न लागेको हो । यस्तै कम्पनीले सडक साइडका लागि बार, विद्युत पोलगायत पनि उत्पादन गर्ने प्रतिवद्धता विभागमा जाहेर गरेको छ ।
उक्त कम्पनीको मातहतमा बार्षिक ९ हजार ९ सय मेट्रिक टन ग्याल्भनाईज्ड पाईप, ३ हजार मेट्रिकटन जीआई पोल र ६ हजार मेट्रिकटन सडकको साईडमा राखिने बार उत्पादन गर्नेछ । यस्तै कम्पनीले अन्य फलामजन्य निर्माण सामग्री तथा पुर्लीनहरुसमेत उत्पादन गर्ने जानकारी दिएको हो ।
यसअघि कम्पनीले आफ्नो उद्योग स्थापनाका लागि सार्वजनिक जग्गा हडपेको भन्दै स्थानीयले विरोध जनाएका थिए । उद्योगले वीरगन्ज–पोखरिया सडक खण्डको ढंगई नदीको पुलदेखि दक्षिण तर्फ करिब ३ किलोमिटरसम्म खोलाको किनारै किनार ठूलो पर्खाल निर्माण गरी जग्गा अतिक्रमण गरेको आरोप छ । नदीको बहाव नै परिवर्तन हुने गरी सार्वजनिक जग्गा कब्जा गरेको भन्दै बहुअर्वाभाठाका स्थानीयले विरोध जनाएका थिए । तर, उद्योगले भने जग्गा अतिक्रमण नगरेको र आफुसँग सबै कागजात सुरक्षित रहेको बताउँदै आएको छ ।
