काठमाडौं । सोमबार रेकर्ड अंकमा वृद्धि भएको सेयर बजारको उछाल मंगलबार भने पतन भएको छ । सोमबार अहिलेसम्मकै उच्च १६१.९४ अंकको वृद्धि भएको नेप्से मंगलबार ४४.१८ अंकले घटेको हो । यससँगै नेप्से परिसूचक घटेर २९३६. ६० विन्दुमा झरेको छ । नेप्से १.४८ प्रतिशतले घटेको हो भने सेन्सेटिभ परिसूचक पनि ५.०५ अंकले घटेर ५४८.३५ विन्दुमा पुगेको छ ।
कूल २२२ वटा कम्पनीको एक करोड ५० लाख ८२ हजार ८१ कित्ता सेयर खरिदबिक्री हुँदा ७ अर्ब ४९ करोड ५८ लाख १२ हजार एक सय ६१ रूपैयाँ बराबरको कारोबार भएको नेप्सेले जनाएको छ । त्यसैगरी मंगलबार कारोबार रकममा पनि गिरावट आएको छ । यसले कारोबार रकमले पनि साथ छाडेको देखिन्छ ।
कारोबार भएका १३ उपसमूहमध्ये म्युचुअल फण्ड र अन्यबाहेक बाँकी सबै उपसमूहको सेयर घटेको छ । मंगलबार पनि सानिमा लाईफ इन्स्योरेन्स कम्पनी लिमिटेडको सेयरमूल्य सकारात्मक सर्किट लागेको छ । कम्पनीको सेयरमूल्य १० प्रतिशतले बढेर ४ सय ५२ रूपैयाँ २० पैसा पुगेको छ ।
मंगलबार आरएमडिसी लघुवित्त वित्तीय संस्था लिमिटेडका लगानीकर्ताहरूले सबैभन्दा धेरै गुमाएका छन् । मंगलबार सर्वाधिक कारोबार हुने कम्पनीहरूको अग्रस्थानमा युनाइटेड मोदी हाइड्रोपावर कम्पनी लिमिटेड रहेको छ । कम्पनीको ६१ करोड ९२ लाख ९१ हजार ६ सय ९२ रूपैयाँ बराबरको कारोबार भएको हो । पछिल्लो केही दिनदेखि लगातार अरूण भ्याली हाइड्रोपावरको सर्वाधिक कारोबार भएको थियो भने युनाइटेड मोदी हाइड्रोपावरको धेरै कारोबार भएको हो ।
