काठमाडौं । नेपाल टेलिकमको फोरजीका ग्राहक एक महिनामै २० लाखले बढेका छन् । टेलिकमले एक महिनामै आफ्ना फोरजीका ग्राहक २० लाखले बढेको दावी गरेको हो । टेलिकमले दिएको जानकारी अनुसार असारमा महिनामा फोरजीका ग्राहक बढेर ४७ लाख ४४ हजार ३ सय ७५ पुगेको छ । यो जेठ महिनाको तुलनामा २० लाख ३६ हजार ९ सय ४६ जनाले बढी हो ।

नेपाल दूरसंचार प्राधिकरण (एनटीए)ले जारी गरेको गत जेठ महिनाको एमआईएस रिपोर्ट अनुसार नेपाल टेलिकमको फोरजी सेवा प्रयोग गर्नेको संख्या जम्मा २७ लाख ७ हजार ४ सय २९ थियो । टेलिकमले असार मसान्तसम्म उक्त संख्या बढेर ४७ लाख ४४ हजार पुगिसकेको बताएको छ ।

जेठ मसान्तसम्मको एमआईएस प्रतिवेदन अपडेट गर्दा फोरजी सब्सक्राईवरको केही तथ्यांक छुट भएकाले कम देखिएपनि ग्याप भने त्यति ठुलो नहुने टेलिकमका सहप्रवक्ता रञ्जित लोहिया बताउँछन् । ‘नेपाल टेलिकमले एमआईएस प्रतिवेदन अपडेट गर्दा केही तथ्यांक छुटेको हुनसक्छ । जसका कारण एनटीएको प्रतिवेदनमा जेठमा कम ग्राहक देखिए । तर, खास तथ्यांक भने हामीले सार्वजनिक गरेको तथ्यांक हो । हाल फोरजीका खास ग्राहक ४७ लाख नै हुन्’, उनले भने । उनले एक महिनामै २० लाखले सेवाग्राही भने नबढेको बताए ।

फोरजीको तथ्यांक एमआईएसमा अपडेट गर्दा एक्टिभ युजरको तथ्यांक मात्रै राख्ने गरिएको उनले बताए । कहिले चलाउने कहिले नचलाउने, सब्सक्राईव गर्ने तर नचलाउनेलगायतमा सेवाग्राहीलाई वर्गीकरण गरिन्छ । सोही अनुसार फोरजी सब्सक्राईव गरी सेवा लिईरहने सेवाग्राहीहरुलाई भने एक्टिभ युजरको क्याटागोरीमा राख्ने गरिएको उनको भनाई छ । तर, कहिलेकाहीँ मात्रै चलाउने, सब्सक्राईब गरेर नचलाएर बस्नेहको तथ्यांक जोड्दो टेलिकमको फोरजी सब्सक्राईव प्रोभिजनमा ७५ लाख नाघ्ने उनी बताउँछन् ।

गत बर्ष नै नेपालभर फोरजी सेवा विस्तार गरिसकेको घोषणा गरेको नेपाल टेलिकमले सबै जिल्लाहरुमा फोरजी सेवा पुगेसँगै ग्राहकहरुको संख्या पनि बढेको बताएको छ । टेलिकमका प्रबन्ध निर्देशक डिल्लीराम अधिकारीले केही क्षेत्रबाहेक सबै क्षेत्रमा टेलिकमको फोरजी सेवा पुगिसकेकाले ग्राहकको संख्या पनि बढ्दै गएको बताए । उनका अनुसार केही क्षेत्रमा भने विभिन्न निकायका कारण फोरजी सेवा विस्तार अझै गर्न सकिएको छैन । तर, विस्तार भईसकेका स्थानमा भने ग्राहकको संख्यामा वृद्धि हुँदै गएको छ ।

नेपाल टेलिकमले विस २०७३ सालदेखि नेपालमा फोरजी सेवाको विस्तार सुरु गरेको थियो । पहिलो चरणमा काठमाडौंमा र पोखरामा मात्रै विस्ता भएको यो परियोजना अघिल्लो बर्षदेखि नेपालभर विस्तार गर्नेगरी सुरु गरिएको थियो । कम्पनीले सबै जिल्लाहरुमा फोरजी सेवा सुरु गरिसकेको भएपनि केही जिल्लाका केही स्थानमा भने विभिन्न अवरोधका कारण काम गर्न सकेको छैन ।

स्थानीय जनता, वन मन्त्रालय, मौसम, कोरोना महामारीलगायतका समस्याका कारण अझै कुल स्थानीय तहको १५ प्रतिशत स्थानीय तहमा फोरजी सेवा विस्तार गर्न नसकिएको टेलिकमका प्रवक्ता राजेश जोशी बताउँछन् । उनका अनुसार नेपालभर हालसम्म ८५ प्रतिशत बढी क्षेत्रमा टेलिकमको फोरजी सेवा विस्तार भईसकेको छ ।

नेपाल टेलिकमका अनुसार हालसम्म कम्पनीको भिओएलटीई सेवा प्रयोग गर्नेको संख्या ५ लाख ६३ हजार पुगेको छ । यस्तै केही महिना अघि मात्रै संचालनमा ल्याईएको एनटीटिभीका ग्राहक पनि २ हजार ५ सय ८६ पुगेका छन् भने १ लाख ८० हजार बढी सेवाग्राहीसम्म फाईबर टु दी होम (एफटीटीएच) सेवा पुगेको छ । कम्पनीले एफटीटीएच परियोजनाअन्तर्गत एउटै अप्टिकल फाईबरमार्फत भ्वाईस, डाटा र भिडियोको सुविधा दिँदै आएको छ ।

जसमा एफटीटीएचमार्फत डाटा प्रयोगकर्ता १ लाख २२ हजार ११०, भ्वाईस प्रयोगकर्ता १ लाख २७ हजार २ सय २३ र भिडियो प्रयोगकर्ता २ हजार ५ सय ८६ पुगेका हुन् । टेलिकमका अनुसार हालसम्म मोबाईल डाटा सेवा १ करोड ९९ लाख ७१ हजार ८६ जनासम्म विस्तार भएको छ । साथै टेलिकमको मोबाईल टेलिफोन सेवा प्रयोग गर्नेको संख्या २ करोड ४ लाख ९ हजार बढी छ ।