काठमाडौं । काठमाडौं उपत्यकामा जारी निषेधाज्ञा पुनः १५ दिन थप्ने तयारी भएको छ । उपत्यकामा निषेधाज्ञा थप्ने विषयमा छलफल गर्न आज तीन जिल्लाका प्रमुख जिल्ला अधिकारी (प्रजिअ) को बैठक बस्न लागेको छ
। बैठक दिउँसो १ बजेपछि बस्ने तय भएको छ । बैठकले नेपालमा पुनः संक्रमितको संख्या बढ्दै गइरहेका स्थितिमा निषेधाज्ञालाई कसरी र कहिलेसम्म जारी राख्नेबारे छलफल हुने बताइएको छ । आज बस्ने बैठकमा लामो दूरीका यातायात पनि खोल्ने कि भन्ने विषयमा पनि छलफल हुनेछ ।
लामो दूरीका यातायात खोल्ने कि नखोल्ने भन्ने विषयमा स्वास्थ्यकर्मी, ट्राफिक प्रहरीलगायत सरोकारवालासँग परामर्श गरिने छ । संक्रमण बढ्दो दरमा रहेकाले तर १५ दिन अहिलेकै जस्तो गरी निषेधाज्ञा लम्बिने सम्भावना रहेको स्रोत बताउँछन ।
लामो दूरीका सवारीसाधन खोल्ने विषय बाहिरी जिल्लासँग सम्बन्धित भएको र यो विषयमा सीसीएसमीले नै निर्णय गर्नुपर्ने भएकाले प्रजिअहरुबीच छलफल मात्र हुनेछ ,।
उपत्यकाभित्र भने सार्वजनिक यातायात यस अघिदेखि नै सञ्चालनमा आइसकेको छ । यसअघि थपिएको निषेधाज्ञाको अवधि आज अर्थात असार ३१ गते राति १२ बजेबाट सकिँदै छ । कोरोना महामारी नियन्त्रणका लागि भनेर काठमाडौं उपत्यकामा गत वैशाख १६ गते निषेधाज्ञा शुरु गरिएको थियो । पटक–पटक अवधि थप्दै र क्रमशः खुकुलो बनाउँदै गएको भएपनि निषेधाज्ञा भने अझै पनि कायमै छ ।
