काठमाडौँ । जापानले नेपाललाई एष्ट्राजेनेकाको १६ लाख डोज खोप दिने भएको छ । काठमाडौंस्थित जापानी राजदूतावासले आउने केही साताभित्र अक्सफोर्डर एष्ट्राजेनेकाले बनाएको भ्याक्सिन नेपाल आउने जानकारी दिएको छ ।
जापानले उक्त खोप कोभ्याक्समार्फत् दिन लागेको हो । जापानमा नै बनेको यो खोप कहिले नेपालमा छिटै आउने दुताबासले जानकारी दिएको छ ।
नेपालका लागि जापानका राजदूत किकुता युताका जापानले दिन लागेको खोपले नेपाल(जापान लामो सम्बन्धलाई दर्शाउने बताएका छन् ।
जापानले दिएको खोपले यसअघि भारतमा उत्पादित कोभिसिल्ड खोपको पहिलो डोज लगाएका वृद्धवृद्धालाई दोस्रो डोज लगाउन मिल्ने छ ।
यसअघि मंगलबार जापानका विदेश मन्त्री ओसिमित्सु मोतेगीले कोभ्याक्समार्फत् नेपालसहितका बंगलादेश, कम्बोडिया, इरान, लाओस, नेपाल र श्रीलंकासहित अरू प्यासेफिक आइल्यान्ड देशलाई १ करोड १० लाख डोज भ्याक्सिन दिने घोषणा गरेका थिए ।
जापानले कोभ्याक्सलाई १ अर्ब डलर र ३ करोड डोज खोप दिने प्रतिवद्धता व्यक्त गरेको छ । जापानले कोरोनाविरुद्ध लड्न यसअघि स्वास्थ्य सामाग्री र अक्सिजन जेनेरेटरहरु पनि दिएको थियो ।
