बिजखबर संवाददाता
१०, मंसिर, काठमाडौं । आन्तरिक राजस्व विभागले चालू आर्थिक वर्षको प्रथम चौमासमा मसान्तसम्म ३७ अर्ब ६८ करोड १४ लाख रुपैयाँ राजस्व संकलन गरेको छ । सो अवधिमा विभागले लक्ष्यभन्दा २६ करोड रुपैयाँ राजस्व संकलन गरेको हो । विभागलाई चार महिनाका लागि ३७ अर्ब ४१ करोड ८६ लाख रुपैयाँ राजस्व उठाउन लक्ष्य तोकिएको थियो ।
विभागले प्रकाशित गरेको तथ्याङक अनुसार विगत चार महिनामा आयकर १६ अर्व २८ करोड २९ लाख रुपैयाँ संकलन गरेको छ भने मूल्य अभिवृद्धि कर (भ्याट) १२ अर्व २७ करोड १७ लाख संकलन गरेको छ । यसैगरी, अन्तःशुल्क आठ अर्व ८१ करोड ३६ लाख असुली भएको विभागले प्रकाशित गरेको तथ्याङकमा उल्लेख छ । विभागको तथ्याङक अनुसार शिक्षा सेवा शुल्क १३ करोड १७ लाख र स्वास्थ्य सेवा कर १८ करोड चार लाख असुली भएको छ । सो अवधिमा आयकर लक्ष्यभन्दा बढी संकलन भएको विभागले जनाएको छ ।
राजस्व उठौतीदर बढाउन बक्यौता र राजस्व असुली उठौती बढाउन आन्तरिक राजस्व विभागका महानर्दिेशक चुडामणि शर्माले जोड दिएका छन् । साथै, शर्माले हाल बक्यौता रकम बढी रहेकाल त्यसलाई उठाउन र बजारमा गएर बील बिजकको निरीक्ष गर्न कर्मचारीलाई निर्देशन दिएका छन् ।
