काठमाडौं । कोरोना संक्रमणको दोश्रो लहरसँगै आएको नयाँ भेरियन्टका कारण नेपालमा अहिले कोरोनाका कारण निकै जटिल अवस्था श्रृजना भएको छ ।
सोमबारमात्रै कोरोनाबाट २१४ नेपालीले ज्यान गयो । कोरोना नियन्त्रणका लागि भन्दै सरकारले बैशाख १६मा काठमाडौं उपत्यकामा निषेधाज्ञा जारी गरेको थियो भने त्ययता देशका ७४ जिल्लामा निषेधाज्ञा जारी भइसकेको छ । तर, पनि दैनिक संक्रमित र मृत्यु हुनेको संख्यामा कमी आएको छैन् ।
स्वास्थ्य तथा जनसङ्ख्या मन्त्रालय सहप्रवक्ता डा. समिरकुमार अधिकारीले स्वास्थ्य क्षेत्र दिनरात कोभिड–१९ विरुद्धको लडाईंमा लागि पर्दा पनि सङ्क्रमण जति घटनुपर्ने हो त्यति घट्न नसकेको बताए ।
अधिकारी विवाह, व्रतबन्ध, चौरासी पूजा जस्ता सामाजिक कार्य र भेला, उद्घाटनजस्ता राजनैतिक कार्यको नाममा हुने ठूला कार्यक्रम जनमानसमा सङ्क्रमण बढनुको कारण रहेको बताउँछन् । उनले कोभिड–१९ को रोकथाम र नियन्त्रणका लागि जारी गरिएका जनस्वास्थ्यका मापदण्ड पालना हुन नसकेका कारण सङ्क्रमण बढिरहेको बताए ।
स्वास्थ्य मन्त्रालयले जनस्वास्थ्यका मापदण्ड र निषेधज्ञा पालना गर्न आग्रह गरेको छ । निषेधज्ञाको समयमा अझै पनि मानिसहरु आवतजावल ५९ प्रतिशत मात्र कमी आएको भन्दै आवतजावतलाई पूर्णतया रोक लगाउनुपर्ने मन्त्रालयको भनाई छ ।
मन्त्रालयले कोभिड–१९ को महामारी नेपालमा केही साता अझै पनि चुनौतीपूर्ण रहने पनि जनाएको छ । मन्त्रालयले सोमबार सूचना जारी गर्दै केही हप्ता अझै पनि चुनैतीपूर्ण रहने भएकाले सबै संयमित र सहयोग भई एकजुट भएर काम गर्नुपर्ने बताएको छ ।
‘जनजीवनमा कठिनाई पर्न गए पनि हामीसंग संक्रमण रोकथाम, नियन्त्रण, तयारी, सहकार्य समन्वय आदिका लागि गरिएको निषेधज्ञाको अझै पनि बुझी नबुझी लुकीछिपि वा खुल्मखुल्ला उल्लंघन भइरहेको देखिन्छ’ सूचनामा छ । कोरोना भाइरसविरुद्धको लडाई मन्त्रालयको एक्लैको नभई सवैको भएको भन्दै यसको रोकथाम, उपचार र नियन्त्रणमा सवैको सहयोग हुनुपर्ने अधिकारीले बताए ।
मन्त्रालयका अनुसार मोरङ, काठमाडौँ, रुपन्देही, काभ्रे, ललितपुर, भक्तपुर, मोरग, कैलाली, कास्की, बाँके, दाङ, चितवन, सुर्खेत, झापा, कन्चनपुर, मकवानपुर, धनुषा, सुनसरी, पर्सा, बर्दिया र पाल्पा बढी सङ्क्रमणको उच्च जोखिम रहेको जनाएको छ ।
