काठमाडौं । अब हवाईमार्गमार्फत नेपाल प्रवेश गर्ने नेपालीले अनिवार्य १० दिन होटल वा होम क्वारेन्टीनमा बस्नुपर्ने भएको छ । अध्यागम विभागले जारी गरेको एक विज्ञप्ति अनुसार अब हवाईमार्गबाट आउने प्रत्येक नेपालीले कोरोनाको नेगेटिभ रिपोर्टसँगै होटल वा होम क्वारेन्टीनमा १० दिनसम्म बस्नुपर्नेछ । पछिल्लो समय नेपाललगायत विश्वभरी नै कोरोनाको नयाँ भेरियन्ट फैलिएपछि सरकारले सिमानाकामा समेत कडाई गरेको छ ।
जसका लागि नेपालको सिमानासँग जोडिएका देशका नागरिकहरुबाहेक अन्य नागरिकहरु स्थलमार्गबाट प्रवेश गर्न पाउने छैनन् । यस्तै स्थलमार्गबाट आउने भारत र चिनियाँ नागरिकले पनि ७२ घण्टाभित्र स्वाव परिक्षण गराई नेगेटिभ आएको रिपोर्टसँगै १० दिन होटल क्वारेन्टीनमा बस्नेगरी होटल बुक गरेको प्रमाण पेश गर्नुपर्नेछ । यस्तै हवाईमार्गबाट आउने विदेशीलाई पनि सोहीअनुसारको नियम लागु हुने अध्यागमन विभागले जानकारी दिएको छ । यस्तै विमानस्थलबाट मात्रै ट्रान्जीट हुनेबाहेक विदेशी नागरिकहरुलाई प्रस्थान अनुमतिसमेत नदिईने विज्ञप्तिमा उल्लेख छ ।
