काठमाडौं । सोमवार २२ अंकभन्दा बढीले बढेको नेप्से परिसुचक मंगलवार पूनः ओरालो लागेको छ । लामो समयपछि सोमवार बुलिस ट्रेन्डमा देखिएको नेप्सेले मंगलवार वियरिस ट्रेन्ड समातेको छ ।
मंगलवार नेप्से परिसुचक ३ दशमलव ३८ अंकले ओरालो लागेको छ । सो दिन सेयर बजार १ हजार ७ सय ५३ दशमलव ७२ अंकमा झरेर बन्द भएको हो । कारोवारमा आएका सवै समूह ओरालो लाग्दा सेयर बजारमा नकारात्मक प्रभाव परेको हो । सो दिन उत्पादन समुहको परिसुचक सवैभन्दा बढी २७ दशमलव ८ अंकले घटेको छ ।
त्यस्तै बीमा समुह २३ दशमलव २६,अन्य ४ र जलविद्युत २ दशमलव ३३ अंकले ओरालो लागेको छ । त्यसैगरी विकास बैंक,होटल र बैंकिङ समुह क्रमशः २दशमलव ३९, २ दशमलव ३ र १ दशमलव ९६ अंकले घटेको छ ।
मंगलवार १ सय ४२ कम्पनी कारोवारमा आएका थिए । ती कम्पनीको ९ लाख ६६ हजार कित्ता सेयरबाट ७५ करोड ७२ लाखको कारोवार भएको छ ।
मंगलवार एभरेष्ट बैंक लिमिटेडको कारोवार सवैभन्दा बढी ११ करोड ५४ लाखको कारोवार भएको छ ।
