काठमाडौं । भारतका वारेन बफेट भनेर चिनिने राकेश झुनझुनवालाको ६२ वर्षको उमेरमा निधन भएको छ । समाचार एजेन्सी एएनआईका अनुसार उनले सोमबार बिहान मुम्बईको ब्रीच क्यान्डी अस्पतालमा अन्तिम सास लिए । उनलाई केही दिनदेखि सास फेर्न समस्या भएको बताइएको छ ।
शेयर बजारका बिग बुल भनिने राकेश झुनझुनवाला जब बजारमा आए, सेन्सेक्स १५० अंकमा पुगेको थियो । र आज जब उनले संसारलाई अलविदा गरे, सेन्सेक्स ५९४०० पुगेको छ। हेरौं उनको सेयर बजारको यात्रा :
रु ५००० बाट सुरु भयो यात्रा
राकेश झुनझुनवाला भारतका ४८औँ धनी व्यक्ति थिए । चार्टर्ड एकाउन्टेन्ट (सीए) झुनझुनवालाले कम्पनीको लेखा परीक्षण गर्नुको सट्टा दलाल पथ रोजे । उनले सन् १९८५ मा रु ५ हजार पुँजीबाट सुरु गरेका थिए । सेप्टेम्बर २०१८ सम्म, शेयरहरूमा उनको लगानीको मूल्य बढेर ११००० करोड रुपैयाँ पुगेको थियो।
यस्तो थियो राकेश झुनझुनवालाको पोर्टफोलियो
उनको पोर्टफोलियोमा स्टार हेल्थ, टाइटन, रालिस इन्डिया, क्यानरा बैंक, इन्डियन होटल्स कम्पनी, एग्रो टेक फुड्स, नजारा टेक्नोलोजी र टाटा मोटर्स पर्छन् ।जुन त्रैमासिकको अन्त्यमा उनले ४७ कम्पनीमा लगानी गरेका थिए । टाइटन, स्टार हेल्थ, टाटा मोटर्स र मेट्रो ब्रान्ड्स जस्ता कम्पनीहरूमा उनको ठूलो हिस्सेदारी थियो।उनी हंगामा मिडिया र एपटेकका अध्यक्ष थिए । उनी धेरै कम्पनीको सञ्चालक समितिमा पनि थिए ।
राजस्थानमा जन्म
झुनझुनवालाको जन्म ५ जुलाई १९६० मा राजस्थानको एक परिवारमा भएको थियो । उनी मुम्बईमा हुर्केका थिए । उनका बुबा मुम्बईमा आयकर आयुक्त थिए । उनले सिडेनहम कलेजबाट स्नातक गरे र पछि इन्स्टिच्युट अफ चार्टर्ड एकाउन्टेन्ट्स अफ इन्डियामा भर्ना भए।
४३ रुपैयाँको शेयरले भाग्य बदल्यो
झुनझुनवालाले सन् १९८६ मा ४३ रुपैयाँमा टाटा टीको ५ हजार शेयर किनेका थिए । तीन महिनामा सेयर १४३ रुपैयाँ पुग्यो ।यो उनको पहिलो ठूलो नाफा थियो।तीन वर्षमा उनले २० देखि २५ लाख रुपैयाँ कमाए । अनुवाद गरिएको
