काठमाडौं । शुभ लक्ष्मी कोष (खुलामुखी) सामूहिक लगानीकोष योजनाको प्राथमिक बजारमा आजदेखि काई विक्रीमा आएको छ । लक्ष्मी क्यापिटल मार्केट लिमिटेडले शुभ लक्ष्मी कोष (खुलामुखी) योजना सञ्चालनका लागि इकाई विक्री गर्न लागेको हो ।
प्रति इकाई रू. १० अंकित दरको ५ करोड इकाई क्यापिटलले विक्री गर्न लागेको हो । कुल इकाईमध्ये ७५ लाख इकाई कोष प्रबद्र्धक लक्ष्मी बैंक लिमिटेडका लागि सुरक्षित गरिएको छ । बाँकी ४ करोड २५ लाख इकाई मध्ये प्रथम चरणमा सर्वसाधारणमा १ करोड ७५ लाख इकाई सार्वजनिक निष्कासनमा आएको हो ।
छिटोमा साउन २३ गतेसम्म सार्वजनिक निष्कासनमा रहने यो इकाई सो अवधिसम्म माग बमोजिम आवेदन नपरेमा भने ढिलोमा भदौ २ गतेसम्म सार्वजनिक निष्कासनमै रहने क्यापिटलको भनाई छ । यी इकाई खरीदका लागि आवेदन दिन चाहने आवेदकहरूले न्यूनतम १०० कित्तादेखि अधिकतम ५० लाख इकाईसम्म माग गर्न सकिने व्यवस्था छ ।
यी इकाई विक्रीको जिम्मेवारी समेत योजना व्यवस्थापक लक्ष्मी क्यापिटल मार्केट लिमिटेडलेनै पुरा गर्नेछ । खरीदकर्ताहरूले विक्री प्रबन्धकसँगै आस्बा सेवामा सहभागी सम्पूर्ण बैंक तथा वित्तीय संस्था र तिनका शाखा कार्यालयहरूसँगै मेरो शेयर वेवसाइट र एप मार्फत पनि आवेदन दिन सकिने व्यवस्था छ ।
योजना व्यवस्थापक लक्ष्मी क्यापिटल मार्केट लिमिटेडको अधिकृत पूँजी ५० करोड रहेको छ भने जारी पूँजी रू. ३० करोड रहेको छ । हाल क्यापिटलको चुक्ता पूँजी भने रू. २७ करोड रहेको छ । योजनाले कमाएको खुद मुनाफाको अनुपातमा इकाईको अंकित मूल्यका आधारमा मुनाफा वितरण गरिने क्यापिटलको भनाई छ । खुद मुनाफामध्ये आवश्यकता अनुसार सञ्चित मुनाफा पुनः लगानी गरिने जानकारी समेत क्यापिटलले दिएको छ ।
