काठमाडौं । विश्वभर फैलिएको कोरोना कहरको असर सर्वत्र छ । नेपालको आर्थिक, राजनीतिक, सामाजिकलगायत विभिन्न क्षेत्रमा यसको असर परेको छ । तर देशभरीको यातायात क्षेत्रको नियमकिय निकाय यातायात व्यवस्था विभागलाई भने हाईसन्चो जस्तै भएको छ ।
विश्वभर कोरोना भाईरस फैलिएको करिव १ बर्ष पुग्न लाग्यो तर नेपालमा भने यसको असर ९ महिनादेखि जारी छ । चैत ११ गतेदेखि लगाईएको लकडाउनका कारण विभिन्न क्षेत्रहरु बन्द भए । सोहीअनुसार यातायात व्यवस्था विभागले दिने सम्पुर्ण सेवाहरु पनि बन्द भए । सोही मौकामा विभागले त्यसअघि छाप्न बाँकी रहेका ७ देखि ८ लाख थान सवारी चालक अनुमतिपत्र (लाईसेन्स) छाप्यो । तर त्यसयता विभागलाई लाईसेन्स छपाईको काम आएको छैन । अर्थात लाईसेन्सको अनलाईन आवेदन खुलाउने र ट्रायल दिने जिम्मा हाल प्रदेशका भौतिक तथा पूर्वाधार मन्त्रालयमा गएको छ ।
उक्त मन्त्रालयहरुबाट लाईसेन्सको आवेदन र ट्रायल खुल्ने निर्णय नभएसम्म विभागले लाईसेन्स छपाईको काम गर्नुपर्ने छैन । नयाँ लाईसेन्सको लिखित तथा ट्रायल परीक्षा प्रदेशले गरेपनि त्यसको समन्वय भने विभागले गर्नुपर्छ । तर अहिले विभाग एउटा सूचना निकालेर समन्वयको कामबाट समेत पन्छिएको छ ।
लकडाउनअघि दैनिक ८ देखि १० हजारको हाराहारीमा लाईसेन्सको आवेदन आउने गरेका थिए । सोहीअनुसार विभागले मागअनुसारको लाईसेन्स आपुर्ति गर्न नसक्दा दैनिकजसो आलोचना खेपिरहेको विभागलाई हाल हाईसन्चोजस्तै भएको छ । लकडाउनपछि सवारी लाईसेन्स छपाई र ट्रायल पनि नहुने भएपछि दैनिकजसो सयौं सेवाग्राहीहरुले विभागका फोन गरेरै सोध्ने गरेका थिए ।
सोही झन्झटलाई पनि पार लगाउन विभागले प्रदेशका मन्त्रालयहरुका सम्बन्धीत व्यक्तिको नम्बर उपलब्ध गराई उक्त झन्झटबाटसमेत मुक्त भएको छ । केहीदिन अघिसम्म धेरैजसो सेवाग्राहीले लाईसेन्सका यावत विषयहरुका बारेमा फोन गरेर झमेला गरेपछि सेवाग्राहीले फोन पनि प्रदेशअन्तर्गतका मन्त्रालयमै गरुन भनेर सूचना जारी गरेको विभागका सूचना अधिकारी डा. लोकनाथ भुसाल बताउँछन् ।
उनका अनुसार विभागमा धेरैजसो सेवाग्राहीले फोन गरेर बुझ्न थालेपछि सम्बन्धित निकायमै बुझ्नका लागि सूचना जारी गरिएको हो । हाल विभागले सबैजसो लाईसेन्स छापेर देशभरका कार्यालयहरुमा पठाएको छ । तर कार्यालयमा दिन बाँकी लाईसेन्सहरु भने जम्मा ५ देखि ६ हजारसम्म मात्रै विभागमा रहेको सूचना अधिकारी भुसालले बताए । ‘हामीले आवेदन आएका जति लाईसेन्सहरु छापेर कार्यालयहरुमा पठाईसकेका छौं,’ उनले भने, ‘अब कार्यालयहरुले भने वितरण गर्न बाँकी होला ।’ लकडाउनअघि विभागमा ७ देखि ८ लाख ओटा लाईसेन्स छाप्न बाँकी थिए ।
