काठमाडौं । विश्वभर फैलिएको कोरोना भाईरसका कारण लामो समय बन्द भएको लामो दुरीको सार्वजनिक यातायात सेवा संचालनमा आएको छ । मन्त्रिपरिषदको सोमबार बसेको बैठकले बसमा सिट क्षमताको ५० प्रतिशत यात्रु राख्ने र पुरानो भाडादरमा ५० प्रतिशत भाडा थपेर लामो दुरीका बस संचालन गर्न निर्देशन दिएको थियो । सोही अनुसार यातायात व्यवसायीले बिहीबारदेखि देशभर लामो दुरीका सार्वजनिक सवारीसाधनहरु संचालनमा ल्याएका छन् ।
यसरी धेरैपछि लामो दुरीका सार्वजनिक सवारीसाधन बढी भाडासहित चल्दा पनि काठमाडौं छोडेर बाहिर जाने यात्रुको भने कमी छैन । अर्थात ६ महिनापछि संचालनमा आएको लामो दुरीको सार्वजनिक सवारीसाधनमा बाहिर जाने यात्रुहरुले आजै (शुक्रबार)मात्रै २० ओटा बढी बस भरिने गरी टिकट बुकिङ गरिसकेका छन् ।
गोंगबु बसपार्कको व्यवस्थापन जिम्मा पाएको ल्होत्से बहुउद्देसीय प्रालीका महाप्रवन्धक सुनिल कुँबरका अनुसार आजै बेलुकासम्म यात्रु भरिएका १५ देखि २० बसहरु काठमाडौं बाहिर जाँदैछन् । ‘बस बाहिर जाने भएपछि यात्रुको भने कमी छैन,’ उनले भने, ‘हामीले २ सिटमा एक यात्रु राखेर टिकट काटिरहेका छौं, यसरी टिकट काट्दा आजै मात्रै १५ देखि २० बस बाहिर जान सक्ने देखिएको छ ।’
काठमाडौंबाट फर्किनेहरुको संख्या हिजोभन्दा आज बढिरहेको नेपाल यातायात व्यवसायी राष्ट्रिय महासंघका महासचिव सरोज सिटौला बताउँछन् । उनका अनुसार लामो रुटका यात्रुहरु हिजोभन्दा आज केही बढेका छन् । यस्तै काठमाडौं बाहिरबाट पनि काठमाडौं भित्रिने बसहरुको संख्या उत्तिकै मात्रामा बढी छ । तर हाल स्थानीय प्रशासनले नै निर्णय गर्न सक्ने भएपछि केही स्थानीय तहबाट भने गाडीहरु आउन पाएका छैनन । ‘कतिपय स्थानीय तहहरुमा अझै पनि निशेधाज्ञा लागु भईरहेकाले त्यस्ता स्थानीय तहबाट गाडी आउन कठिन भैरुहेको छ,’ उनले भने, ‘तर हामीले रोकिएको यात्रुबाहक बसहरु पठाउन र ल्याउन विभिन्न निकायसँग समन्वय र पहल गरिरहेका छौं ।’
यता स्थानीय प्रशासनकै कारण देशको पश्चिमबाट आजै मात्रै २ देखि अढाई सय गाडी र पूर्वबाट पनि सोही अनुसारकै संख्यामा काठमाडौं बस आईपुग्ने उनको भनाई छ । तर पश्चिमको सुर्खेतमा अझै निशेधाज्ञा भएकाले ५ गतदेखि मात्रै बस संचालन गर्न दिने निर्णय भएको ल्होत्सेका महाप्रबन्धक सुनिल कुँवर बताउँछन् । यसरी विभिन्न स्थानबाट बसहरु आउने र काठमाडौंमा भएका गाडीहरु बाहिर जाने प्रक्रिया चलिरहेको उनको भनाई छ । काठमाडौंबाट टिकट काटेर बाहिर जाने यात्रुहरुका लागि विभिन्न सुरक्षा नीति अपनाएर टिकट काट्ने र बसमा चढ्ने व्यवस्थासमेत मिलाइएको उनले जानकारी दिए ।
