काठमाडौं । दशैंको अवसर पारेर राजधानीको भृकुटीण्डपमा आयोजना गरिएको स्टक क्लियरेन्स मेला आइतबार सम्पन्न भएको छ ।
५ दिनसम्म चलेको उक्त मेलामा ९२ हजार जनाले अवलोकन गरेका छन् । बुधबार देखि सुरु भएको सो मेलामा सस्तोमा सामान किन्न आउनेहरुको भिडले गर्दा व्यवसायीहरु उत्साहित बनेको आयोजकले जानकारी दिएका छन ।
इभेण्ट सोलुसन प्रालिको आयोजनामा संचालन भएको मेलाले एकै छानामुनी सेवाग्राहीलाई सस्तो मूल्यमा गुणस्तरीय सामान किन्ने अवसर प्रदान गरेको नेपाल चेम्बर अफ कमर्शका अध्यक्ष राजेशकाजी श्रेष्ठले बताए । आगामी दिनहरुमा पनि यस किसिमका मेलाहरुलाई चेम्रले प्रवद्र्धन गर्दै लैजाने उनको भनाइ रहेको छ ।
‘दशैंको बेला सस्तो मेला’ भन्ने नाराका साथ संचालन गरिएको मेलाबाट उपभोक्ता र व्यवसायी दुवै लाभान्वित भएको इभेण्ट सोलुसनका बजार निर्देशक नविन भट्टले जानकारी दिएका छन । मेलामा बिएफ डियर हिल, रन सुज, शिखर सुज र शुल्याण्डका १ हजारभन्दा बढी मोडलका जुत्ता तथा चप्पलहरुमा बढी भिढ लागेको बिएफ डियर हिलका प्रबन्ध निर्देशक होमनाथ उपाध्यायले बताए ।
रन सुजका प्रबन्ध निर्देशक रुद्र न्यौपानेका अनुसार स्टक क्लियरेन्स मेला सकिए पनि ४ ब्राण्डको जुत्ता मेला भने फूलपातीसम्म निरन्तर चलिरहने छ । एक्स्पोमा नेपाल, भारत, पाकिस्तान, बंगलादेश, चीन, थाइल्याण्ड र जापानका उत्पादन तथा प्रदर्शकहरुको सहभागिता रहेको थियो ।
