काठमाडौं । एभरेष्ट इन्स्योरेन्सले ५१ प्रतिशत संस्थापक सेयर कायम गरेर मात्रै हकप्रद शेयर निष्कासन गर्ने भएको छ । कम्पनी संचालक समितिको यही माघ १८ गतेको बैठकले उक्त निर्णय गरेको हो ।
साथै एभरेष्ट इन्स्योरेन्सले बीमा समितिले दिएको निर्देशन बमोजिम ५१ प्रतिशत संस्थापक सेयर कायम गरेर हकप्रद शेयर जारी गर्ने निर्णय गरेको विज्ञप्तीमार्फत उल्लेख गरेको छ । बीमा समितिले एभरेष्टलाई पुस २८ गते संस्थापक सेयरको हिस्सा ५१ प्रतिशत कायम गर्न निर्देशन दिएको थियो ।
सोही अनुरुप एभरेष्टले ५१ प्रतिशत संस्थापक सेयर कायम गरेर बीमा समितिको निर्देशन अनुरुप चुक्ता पूँजी पुर्याउन हकप्रद जारी गर्ने निर्णय गरेको छ । जसअनुसार कम्पनीले यस अघि घोषणा गरेको ६ सय प्रतिशत हकप्रद सेयर समेत परिमार्जन हुने जानकारी गराएको छ ।
