काठमाडौं । नेपाल धितोपत्र बोर्डले धितोपत्र व्यवसायी (धितोपत्र दलाल, धितोपत्र व्यापारी तथा वजार निर्माता नियमावली), २०६४ मा पहिलो संसोधन गरेको छ । ब्रोकर व्यवसायीलाई जिल्ला स्तरमा शाखा विस्तार गर्न सहज र उनीहरुको जनशक्ति व्यवस्थापनमा सहयोग पुर्यायाउने उद्देश्य अनुरुप संसोधन गरिएको बोर्डले जानकारी दिएको छ ।
संसोधनसँगै ब्रोकर कम्पनीको चुक्ता पूँजी उच्च रुपमा बढेको छ । हाल ब्रोकर कम्पनीले २० लाख रुपैयाँको चुक्ता पूँजीमा कम्पनी खोल्दै आएकोमा त्यसलाई १० गुणाले बढाएर २ करोड रुपैयाँ पुर्याएको छ ।
यसैगरी बोर्डको स्वीकृति लिएर मात्र शाखा कार्यालय खोल्न सक्ने र आवश्यक पूर्वाधार तथा अन्य शर्तहरु बोर्डले तोक्न सक्ने व्यवस्था गरेको छ भने मुख्य कार्यालयमा कम्तीमा बाणिज्यशास्त्र, अर्थशास्त्र, व्यवस्थापन, कानुन विषयमा स्नातक वा चार्टर्ड एकाउन्टेन्सी गरेको व्यक्ति प्रमुख हुनुपर्ने व्यवस्था लागु गरेको छ । यसैगरी परिपालन अधिकृत तथा सूचना प्रविधि सहित पाँच कर्मचारी हुनुपर्ने छ । यस अघि नेपाल स्टक एक्स्चेञ्जले जथाभावी रुपमा ब्रोकरलाई शाखा कार्यालय खोल्न दिएको भन्दै बोर्डले आपत्ति जानउँदै आएको थियो ।
यसरी संशोधित व्यवस्थानुसार वोर्डले धितोपत्र व्यवसायीको शाखा व्यवस्थापनलाई अझ व्यवस्थित र सुदृढ गर्दै लगिने र जसवाट धितोपत्र व्यवसायको व्यवसायिक जोखिम न्युनिकरण हुदै जानेछ बोर्डको विश्वास छ ।
