बिजखबर संवाददाता
३० पुस, काठमाडौं । नेपाली युवा उद्यमी मञ्चले अमेरिकी राजदुतावासको सहकार्यमा ‘आन्ट्रप्रिनर बुट क्याम्प’ सञ्चालन गर्न लागेको छ । बुधवार राजधानीमा पत्रकार सम्मेलन गरी यस्तो जानकारी दिइएको हो ।
क्याम्प आगामी फागुन १४ गतेदेखि सञ्चालन गरिने बताइएको छ । काठमाडौंको पार्क भिलेज रिसोर्टमा हुने सो क्याम्प ३ दिनसम्म चल्ने आयोजकले जानकारी दिएको छ ।
सम्मेलनमा मञ्च प्रेस संयोजक सुदर्शन बस्नेतले युवाहरुलाई उद्यमशीलताको विकास गराउन क्याम्प सञ्चालन गर्न लागिएको जानकारी दिए । बुट क्याम्पमा छनोट भएका युवालाई उद्यमशीलताको लागि सहयोग गर्ने उनले बताए । सो अवसरमा मञ्चका अध्यक्ष निरञ्जन श्रेष्ठले उद्यमशीलताको विकासका नेपालमै पहिलो पटक कार्यक्रम आयोजना गरिएको बताए । साथै कार्यक्रम वार्षिक दुईवटा गरिने उनले जानकारी दिए ।
अमेरिकी दूतावासका प्रतिनिधि टड युंगेनबर्गले नयाँ सोच भएका युवालाई उद्यमशीलतामा ल्याउने कार्यक्रमले उत्साहित बनाएको बताए । ‘अनलेस योर आइडीआज’ नाराका साथ गरिने क्याम्पमा देशैभरीबाट खुला प्रतिस्पर्धामार्फत ३२ जना युवाको छनोट गरी उनीहरुको व्यावसायिक सोचलाई मुर्त रुप दिन विभिन्न विषयमा तालिम दिइने छ । सहभागीहरुलाई व्यवसाय सुरु गर्ने,व्यावसायिक योजना बनाउने जस्ता विषयमा देशका सफल उद्यमी व्यवसायीबाट प्रशिक्षण दिने तथा पूर्ण व्यावसायिक योजना बनाउन लगाउने बताइएको छ ।
क्याम्पमा तयार पारिएको व्यावसायिक योजनालाई स्वतन्त्र निर्णायक मण्डलमा प्रस्तुत गरी उत्कृष्ट योजना बनाउने एकजना सहभागीलाई नेपाली युवा उद्यमी मञ्चले बनाउन लागेको इन्क्युवेशन सेन्टर र एक्सिलेटर प्रोग्राममा सहभागी गराइने छ । यस कार्यक्रमले ३२ जना यूवालाई उद्यमी बन्न पे्ररित गर्ने र उद्यम सुरु गर्न सहयोग पु¥याउने विश्वास मञ्चको छ ।
